අන්තර්ජාලය ඔස්සේ මූල්ය වංචා සිදුකිරීම සම්බන්ධයෙන් වැල්ලවත්ත හැවුලොක් පාරේ පිහිටි සුපිරි නිවාස සංකීර්ණයක දී පුද්ගලයින් 58 දෙනෙක් අපරාධ පරීක්ෂණ දෙපාරත්මේන්තුව විසින් අත් අඩංගුවට ගෙන තිබේ. මෙතෙක් මෙවැනි පරිගණක අපරාධ සම්බන්ධව බුරුතු පිටින් හසුවී තිබුණේ විදේශිකයන් වුවද මෙම පුද්ගලයින් 58 දෙනාම ශ්රී ලාංකිකයන් වීම විශේෂත්වයකි.
අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශයට විදේශිය තානාපති කාර්යාලයකින් ලද තොරතුරක් අනුව මෙම විමර්ශනය ආරම්භ කර තිබිණි. අනතුරුව ඊයේ පස්වරුවේදී විමර්ශන නිලධාරීහු මෙම අපරාධ ස්ථානය වටලා තිබේ. එහිදී සැකකරුවන් 58 දෙනෙක් විමර්ශන නිලධාරීන්ගේ අත් අඩංගුවට පත් වී තිබුණු අතර පොලිසිය පැවසුවේ ඔවුන් සියලු දෙනා ශ්රී ලාංකිකයින් බවය.
පොලිස් මධ්ය ප්රකාශක නිහාල් තල්දූව මෙම අපරාධය සම්බන්ධව පැහැදිලි කිරීමක් කරමින් මෙසේ පැවසුවේය. ” යම් කිසි පිරිසක් විසින් වංචා සහගත ලෙස කටයුතු කරමින් කොරියාවේ සිටිනා කොරියානු ජාතිකයෙකුගෙන් ශ්රී ලංකා මුදලින් රුපියල් කෝටි 30කට ආසන්න මුදලක් වංචා කරලා තියනවා කියලා අපට විදේහ තානාපති කාර්යාලයකින් පැමිණිල්ලක් ලැබුනා. මේ අනුව මෙම ස්ථානයත් නිරීක්ෂණය කරලා ගරු අධිකරණයෙන් සෝදිසි වරෙන්තුවකුත් ලබාගෙන ඊයේ දිනයේ දී මෙම ස්ථානය අපරාධ පරීක්ෂණ දෙපාර්තමේන්තුවේ නිලධාරීන් විසින් වටලනු ලැබුවා. රුපියල් ලක්ෂ 90කට වැඩි මුදලක් කුලී ලෙස ගෙවමින් තමයි මෙම ස්ථානය පවත්වාගෙන ගොස් තිබුණේ. විව් ටෙක් සිලෝන් ප්රයිවට් ලිමිටඩ් කියලා පුද්ගලික ආයතනයක් ලෙස පවත්වාගෙන යමින් අන්තර්ජාලය හරහා මුදල් වංචා කරන ආකාරය විමර්ශකයින් පසුව පෙනී ගියා.
“ඊයේ (08) දිනයේ දී අප අත්අඩංගුවට ගත්තා එම ආයතනයේ අධ්යක්ෂවරියක ලෙස කටයුතු කරන කොළඹ 07 ප්රදේශයේ පදිංචි අවරුදු 52ක කාන්තාවක්. ඒ වගේම කළමනාකරුවෙක් ලෙස අත් අඩංගුවට ගත්තා රාගම ප්රදේශයේ පදිංචි අවුරුදු 40ක පුද්ගලයෙක්. මේ දෙදෙනා මෙහෙයවීම් කටයුතු සිදුකරලා තියන බව පේනවා. තවත් පුද්ගලයින් මේකට සම්බන්ධ වෙලා ඉන්නවා අධ්යක්ෂවරුන් වශයෙන් සහ විවිධ තනතුරු දරමින් ඔවුන් අත් අඩංගුවට ගැනීම සඳහා ක්රියාමාර්ග මේ වනවිට ගනිමින් සිටිනවා. ”
“ඒ වගේම යම් කිසි ආකාරයක විදේශීය රටක විදේශීය ජාතිකයො හෝ කණ්ඩායමක මෙහෙයවීම මත මෙම ස්ථානයේ මේ කටයුතු සිදුකරමින් ඇති බව තමයි නිරීක්ෂණය වෙලා තියෙන්නේ. විශේෂයෙන්ම ඔවුන්ගේ ඉලක්ක වෙලා තියෙන්නේ විදේශීය රටවල වෙසෙන ජාතිකයින්. ” ඔහු කීවේය.
