වැලිගම වැලිහිඳ සල්මල් උයන ප්රදේශයේ නිවසක කුලී පදනම මත රැඳී සිටිය දී සැක කටයුතු රසායනික ද්රව්ය තොගයක් සමග විදේශීය ජාතික තරුණයෙක් අත් අඩංගුවට ගෙන තිබේ.
අද (21) පෙරවරු දහයට පමණ වැලිගම පොලිසිය විසින් මෙම වැටලීම සිදුකර තිබිණි. එහිදී සැකකාර විදෙස් ජාතිකයා සැක කටයුතුරසායන ද්රව්ය තොගයක් සමග අත් අඩංගුවට ගෙන ඇත.
පොලිසිය පැවසුවේ සැක කටයුතු රසායනික ද්රව්ය සහිතව මෙසේ අත් අඩංගුවට ගත්තේ 18 හැවිරිදි මෝලඩෝවා ජාතික තරුණයෙක් බවය. මෝල්ඩෝවා යනු යුක්රේනයට නිරිත දිගින් පිටිහි රාජ්යයකි.
මෙම සැකකරු මෙරට පුද්ගලයින් කීප දෙනෙක් සමග එක්ව අදාල ස්ථානයේ යම් කිසි සැකකටයුතු රසායනික නිශ්පාදන ක්රියාවලියක නිරත වී ඇති බව මූලික විමර්ශනවලදී අනාවරණය වී ඇත.
ස්ථානයේ තිබී අවර්ණ දියර සහිත ලීටර 05 කෑන් 20ක්, ප්ලාස්ටීක් බෝතල්වල ඇසුරුම් කරන ලද රසායනික ද්රව්ය අඩංගු බෝතල් 04ක්, ප්ලාස්ටීක් කැබලි අඩංගු කිලෝ ග්රෑම් 05 බැගින් වු පැකට් දෙකක්, සුදු පැහැති කුඩු වැනි රසායනික ද්රවය ඇසුරුම් 02ක්, අයිස් මත්ද්රව්යයට සමාන ද්රව්ය අඩංගු පාර්සලයක් හමුවී තිබේ.
එමෙන්ම වායු සමනය කරන ලද කාමරයක කාමරයක් තුළ මෙම නිශ්පාදන ක්රියාවලිය සඳහා රසායනික ද්රව්ය දමා ඇති ප්ලාස්ටීක් තැටි 10ක්, තරාදියක් සහ උෂ්ණත්වමානයක් ආදී උපකරණ ද පොලිසිය විසින් සොයාගෙන ඇත. ඔහු සතුව තිබී සොයා ගත් රසායනික ද්රව්ය කුමන කටයුත්තක් සඳහා යොදා ගත්තේ ද යන්න මෙතෙක් නිශ්චිතව අනාවරණය වී නැත.
අදාල ද්රව්ය රජයේ රස පරීක්ෂකවරයා මගින් විශ්ලේෂණය කිරීමට නියමිතය. දැනට සැක කෙරෙන්නේ මෙම ස්ථානයේ අයිස් මත්ද්රව්ය නිශ්පාදනය කර ඇති බවය.
