මනම්පිටිය නිමල් ජයරත්න
වැලිකන්ද මහවැව ප්රදේශයේ කළුදියවැව ආසන්නයේ පස් සෝදා ක්රියාත්මක කරන වැලි ලබාගැනීමේ ව්යාපෘතියෙන් මඩ සියල්ල එම වැවට මිශ්රවී පවුල් පන්සියයකට පමණ මඩවතුර බීමට සිදුවීමට එරෙහිව විරෝධය පළ කරමින් මනම්පිටිය නැගෙනහිර මහවැව ගම්මානයේ පුද්ගලයෙකු අඩි සියයක් පමණ උසැති ජල ටැංකියකට නැගි මාරාන්තික උපවාසයක් ආරම්භ කර ඇත.
මෙලෙස උපවාසයක නිරතව සිටින්නේ වැලිකන්ද මහවැව ගම්මානයේ අංක 188/01 ලිපිනයේ පදිංචිව සිටින
38 වියති තිදරු පියෙකු වන එච්.ජී.ඒ. සම්පත් කුමාර ය.
ශ්රී ලංකා මහවැලි අධිකාරිය යටතේ පවතින එම කළුදියවැව ආශ්රිතව මීට මාස දෙකකට පමණ ඉහතදී යම් කණ්ඩායමක් විසින් මඩ සෝදා ඉන් වැලි ලබා ගැනීමේ ව්යාපෘතිය ආරම්භ කර ඉන් විශාල පරිසර හානියක් සිදුවන බවත්, පස් සෝදා අපිරිසිදුවන ජලය සම්පූර්ණ වැවට මිශ්රවීම හේතුවෙන් එම වැවේ වතුර පානය කරන පවුල් 500 ක පමණ පුද්ගලයින් 1500 කට ආසන්න පිරිසක් දැඩි සෞඛ්ය ගැටලුවලට මුහුණ දෙන බවත්, ඒ පිළිබඳව ලිඛිත හා වාචිකව සියලු බලධාරීන් දැනුවත් කළද ඊට කිසිදු විසඳුමක් නොමැති නිසා තම ගම්මානයේ ජීවත්වන පුද්ගලයන්ගේ සෞඛ්ය ආරක්ෂාව වෙනුවෙන් මෙම මාරාන්තික උපවාසය ආරම්භ කර බවත් සම්පත් කුමාර අප සමග සඳහන් කළේය. ඔහු කියන්නේ මේ වනවිට වැව මුළුමනින්ම දූෂණය වී ඇති බවය.
සම්පත් කුමාර අඩි සීයක් උසැති ජල ටැංකියට ගොඩවී උපවාස කිරීමත් ආරම්භ කිරීමත් සමඟ ගම්මානයේ ගොවි සංවිධාන නියෝජිතයින්, මෙන්ම ගම්වාසින් විශාල පිරිසක් ඔහුගේ සහයට ජල ටැංකිය අසලට පැමිණ ඇත.
නෑමට, ජලය නැති කරන සහ වැවේ ජලය අපිරිසිදු කරන එම ව්යාපෘතිය වහාම නතර කරන ලෙසද ගම්වාසීන් අදාළ බලධාරීන්ගෙන් ඉල්ලීමක් කළහ.
ගොවි සංවිධාන සමඟ සාකච්ඡා නොකර ශ්රී ලංකා මහවැලි අධිකාරියේ නිලධාරීන්ගේ තීරණය මත එම ව්යාපෘතියට අවසර ලබා දී ඇති බවත්, මේ හේතුවෙන් ගම්මානයේ පාසල් දරුවන් මෙන්ම ගම්වාසීන්, ගොවි ජනතාව, ලෙඩ රෝගවලට ගොදුරු වන බවත්, ගැමියෝ කීහ.
එම තත්ත්වය සැලකිල්ලට ගනිමින් මෙම ව්යාපෘතිය නතර නොකෙරෙන්නේ නම් ගම්මානයේ සියලු දෙනාම එක්ව ඊට විරුද්ධව සටන් කරන බව ද ගම්වාසීහු සඳහන් කළහ.
