මනම්පිටිය නිමල් ජයරත්න –
වී කිලෝවක මිල සීඝ්රයෙන් පහළ විනාශ පත්වෙමින් පවතින බවත් මේ වනවිට මහවැලි බී කලාපයේ නාඩු සහ සම්බා වී කිලෝවක මිල රුපියල් 70 ත්, 80 ත් අතර මිලකට පහළ බැස ඇති හෙයින් එම මිලට වී තොග මහා පරිමාණ ව්යාපාරිකයන්ට ලබාදීමෙන් විශාල පාඩු සිදුවන බවත් අන්ත අසරණ වූ වැලිකන්ද ගොවීහු ලංකාසරට පැවසූහ.
වැලිකන්ද සෙවනපිටිය කටුවන්විල කඩවතමඩුව ඇතුළු ගම්මාන රැසක ගොවීන් වැඩිවූ නිශ්පාදන පිරිවැය ආවරණය කරගැනීම සඳහා නිසි මිලක් බලාපොරොත්තුවෙන් වී ප්රමාණයක් තමන් සන්තකයේ තබාගෙන තිබුණත් මේ වනවිට වෙළෙඳ පොළේ කිලෝවක මිල රුපියල් 70ත් 80ත් අතර මිලකට පහත බැස හෙයින් බරපතල ගැටලුවකට මුහුණ දී සිටිති.
පොලොන්නරුව වැලිකන්ද වී ගොවීන් මෙන්ම කුඩා හා මධ්ය පරිමාණ වී මෝල් ව්යාපාරිකයින්යින් මුහුණ පා සිටින වත්මන් තත්ත්වය පිළිබඳව පැහැදිලි කිරීමට පුලතිසි ගොවි වෙළඳ පාරිභෝගික හවුල විසින් අද (13) වැලිකන්ද සුසිරිගම ශ්රී සුදර්ශනාරාම විහාරස්ථානයේදී මාධ්ය සාකච්ඡාවක්ද කැඳවා තිබුණි.
එම හවුලේ අනුශාසක දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර නාහිමියන්, වැලිකන්දේ වී ගොවීන් මුහුණ පා ඇති තත්ත්වය සම්බන්ධයෙන් අදහස් දක්වමින් මෙසේ පැවසූහ.
“වී මිල සීඝ්රයෙන් පහත වැටීම හේතුවෙන් ගොවියා මෙන්ම කුඩා පරිමාණ වී මෝල් හිමියනුත් දැඩි අසරණ තත්ත්වයට පත්ව සිටිනවා. ගොවීන් බලාපොරොත්තු වුනේ තමන්ට නිසි මිලක් ලැබෙයි කියලා. රටම දන්නවා දැන් කුඹුරක් කරන්න යන වියදම. තෙල් පොහොර ටිකේ ඉඳන් හැමදේම එකට තුන් ගුණයක් ගණන් ගිහින්. මේ තියෙන්නෙ තමන්ගේ කර උකස් ගරලා අත්පත් කරගත්තු බලාපොරොත්තුව. මේ මෙහොත වනවිට වී කිලෝ ලක්ෂ ගණනින් විනාශ වෙමින් තබෙන්නෙ.“
“ ඇතැම් කුඩා පරිමාණ ව්යාපාරිකයින් සතුව තිබෙන වී තොග මේ වනවිට සත්ව ආහාර පිණිසවත් ලබාදීමට නොහැකි තත්ත්වයට පත්වෙලා. මේක ජාතික අපරාධයක්. මේ අපරාධය වෙන්න දෙන්න එපා.“
“පවතින තත්ත්වය සැලකිල්ලට ගෙන රටින් සහල් ආනයනය කිරීම වහාම නතර කරන්න. පොළොන්නරුවේ ගොවීන්ගේ වී තොග, තවදුරටත් විනාශ වීමට පෙර සාධාරණ මිලකට ගැනීමට රජය වැඩපිළිවෙළක් සකසන්න..“ පුලතිසි ගොවි වෙළඳ පාරිභෝගික හවුල වෙනුවෙන් රාහුලාංකාර හිමියෝ ඉල්ලූහ.
