මනම්පිටිය නිමල් ජයරත්න
මඩකලපුව සිට මහව දක්වා බඩු,භාණ්ඩ හා පාර්සල් ප්රවාහනය කරමින් තිබූ දුම්රියට 21 සවස වැලිකන්ද රුවන්පිටිය ප්රදේශයේදී ගැටුණු වන අලියෙකු බරපතල තුවාල ලබා මියගොස් ඇති බව වැලිකන්ද වනජීවි නිලධාරීන් සඳහන් කරයි.
දුම්රියේ ගැටි මියගිය වන අලියා උසින් අඩි 8 ක් සහ වයසින් අවුරුදු 35 ත් 40 අතර පමණ වන ගැහැණු සතෙකු බව අප කළ විමසුමක දී වනජීවි නිලධාරීහු පැවසූහ.
දහවල් කාලයේ දී දුම්රියේ ගැටුණු මෙම වන අලියා පැයක පමණ කාලයක් ජීවිතය සමග පොරබදමින් සිටියේය. ප්රදේශවාසීන් සහ වනජීවී නිලධාරීන් වන අලියා බේරා ගැනීමට දැඩි උත්සාහයක් ගත්තද එම උත්සාහය අසාර්ථක වුණි.
දහවල් කාලයේදී රුවන්පිටිය වැව් ඉස්මත්තේ වන අලි දහ දෙනෙකුගෙන් යුත් වන අලි රංචුවක් සැරිසරති. එම රංචුවේ සිටි අලියෙකු මෙම දුම්රියේ ගැටී බරපතල තුවාල ලබා මෙසේ මියගොස් තිබිණි. මහ දවාලේ පවා මෙසේ දුම්රියේ ගැටි වන අලි මිය යෑම රටේ ඛේදවාචයක් බව මෙම ඛේදවාචකය දකින පිරිස් පැවසූහ.
වන අලියාගේ පශ්චාත් මරණ පරීක්ෂණ කටයුතු, වනජීවි දෙපාර්තමේන්තුවේ ගිරිතලේ වනජීවී පශුවෛද්ය සමීර කළිඟුආරච්චිගේ සහ වනජීවි නිලධාරීන්ගේ සහභාගිත්වයෙන් සිදු කිරීමෙන් පසු අවසන් කටයුතු හෙට 22 සිදු කිරීමට කටයුතු කරන බව මේ සම්බන්ධ පරීක්ෂණ සිදුකරන වැලිකන්ද වනජීවී නිලධරින් පවසයි.
