කීර්ති ප්රනාන්දු –
වැඩිවුන විදුලිබිලට විරෝධය පෑම සඳහා මහා සංඝයා වහන්සේ විසින් හෙට ඉරිදා පෝය දිනය තුළ සවස 6 සිට රාත්රි 10 තෙක් විදුලි පහන් නොදල්වා පන්සල් අඳුරේ තබා විරෝධය පල කිරීමට සහාය දීමක් ලෙස හෙට දිනයේ කොළඹ අගරදගුරු පදවියේ සියලුම දේවස්ථානවල සවස 6 සිට රාත්රී 10 තෙක් විදුලි පහන් නිවා දැමීමට කොළඹ අග රදගුරු අති උතුම් මැල්කම් කාදිනල් රන්ජිත් හිමිපාණන් දැනුම් දී ඇති බව සිරිල් ගාමිණි ප්රනාන්දු පියතුමා අද විශේෂ මාධ්ය සාකච්ඡාවක් පවත්වමින් ප්රකාශ කළේය.
ජීවත්වීම අතිශය දුක්ඛිත ඛේදවාචකයක් වී ඇති අවස්ථාවක මේ ආකාරයෙන් විදුලි බිල ඉහළ නැන්වීම රටේ ජනතාවට දරා ගත නොහැකි බවත් පන්සල්වල හිමිවරුන් මේ විරෝධය පල කරන්නේ පන්සල්වල විදුලිබිල සම්බන්ධවම නොව, රටේ පොදු ගැටලුව වෙනුවෙන් බවත් සිරිල් ගාමිණි ප්රනාන්දු පියතුමා කීවේය.
මේ අවස්ථාවේ දී එම පොදු සමාජ කාරණාව වෙනුවෙන් මහා සංඝයා වහන්සේ ගත් ක්රියාමාර්ගයට සහයෝගය පලකිරීම වෙනුවෙන් කොළඹ අගරදගුරු පදවියේ සියලුම දේවස්ථානවල විදුලි පහන් සවස 6 සිට රාත්රී 10 තෙක් නිවා දමන බව උන්වහන්සේ පැවසූහ.
වැඩිදුරටත් කරුණු දැක්වූ සිරිල් ගාමිණී පියතුමා කීවේ මේ ආර්ථික අර්බුදයෙන් ගොඩ ඒමට ඊට කිසිසේත්ම වගකිවයුතු නැති අහිංසක ජනතාව පෙළීම සිදුනොකළ යුතු බවත් රට මුහුණ දී ඇති සමාජ දේශපාලන ආර්ථික අර්බුදයට පිළියම් සෙවීමට නම් හොරකම, වංචාව දූෂණය වසාගත් මේ දේශපාලන සංස්කෘතිය වෙනස් කළ යුතු බවත්ය.
“මේ විදුලිබිල අප දකිනවා සාමාන්ය ජනතාවට වගේම ආගමික ස්ථානවලටත් ඉතාම ධරුණු ලෙස බලපාලා තියනවා.“
“පොදුවේ ගත්තම සියටට පන්සීයක් විදුලි ගාස්තු ඉහළ ගිහින්. මේ වගේ පීඩාකාරී අවස්ථාවක මේ විදිහෙ වැඩිවීමක් දරාගන්න පුලුවන්කමක් නෑ.“
“ඊට විරෝධය පලකරන්න හෙට පෝය දවස සියලුම පන්සල්වල විදුලිපහන් නිවා දමලා කළුවරේ තියන්න මහා සංඝයා වහන්සේ තීරණය කරලා තියනවා.“
“මේ විරෝධාතවය දක්වනු ලබන්නේ පොදුවේ මුලුමහත් ජනතාවටම දැනෙන පීඩනය සන්නිවේදනය කරන්න. ඉතින් උන්වහන්සේලාට දැනෙන පීඩනයත් සමග අපත් එකඟ වෙනවා.“
“කොළඹ අගරදගුරු පදවියේ දේවස්ථාන තුළ ඉරිදා සවස සම්පූර්ණ රාත්රිය විදුලි පහන් නිවලා තියන්න අති උතුම් කාදිනල් හිමිපාණන් දැනුම් දීලා තියනවා.“
කෙසේ වෙතත් වැඩිකර තිබූ විදුලි බිලට සහනයක් ලබා දෙන බව කියමින් මහජන උපයෝගීතා කොමිෂන් සභාවේ සභාපති ජනක රත්නායක අද පෙරවරුවේ මල්වතු අස්ගිරි මහා නායක හිමිවරුන් හමුවී තිබේ.
ඔහු මහානායක හිමිවරුන්ට දැනුම් දී ඇත්තේ විදුලිබිලට සහනයක් ලෙස ආගමික ස්ථාන, පුණ්ය ආයත ඛාණ්ඩයෙන් ඉවත් කර පොදු කාර්ය යටතට ගැනීමට තීරණය කළ බවය.
ඒ අනුව රුපියල් 65ක් වූ විදුලි ඒකකයක මිල රුපියල් 32 දක්වා අඩු කෙරෙන බව ඔහු පවසා ඇත.
