මනම්පිටිය නිමල් ජයරත්න –
පොළොන්නරුව වැලිකන්ද ත්රිකෝණමඩුව රක්ෂිතයට නීති විරෝධී අන්දමින් ඇතුළු වු හයදෙනෙකු වැලිකන්ද වනජීවී නිලධාරින් අත්අඩංගුවට ගෙන පොළොන්නරුව අධිකරණයට ඉදිරිපත් කිරීමෙන් පසු වසර අටක් විභාග වූ නඩුවකින්, එක් සැකකරුවෙකුට රුපියල් හාරලක්ස පනස්දාහ බැගින්, සැකකරුවන් හයදෙනාට රුපියල් විසිහත් ලක්ෂයක දඩ මුදලක් ගෙවන ලෙසත්, මුදල් නොගෙවන්නේනම් සැකකරුවෙකුට මාසහය බැගින් බරපතල වැඩ සහිත සිර දඬුවම් ලබාදෙන ලෙසත් ඊයේ (11) පොළොන්නරුව අංක 02 මහේස්ත්රාත් අන්වර් සදාක් මහතා නියෝග කළේය.
2013 පෙබරවාරි 23 වෙනිදා, මෙම සැකකරුවන් හයදෙනා පොළොන්නරුව වැලිකන්ද, ත්රිකෝණමඩුව රක්ෂිතයට අවසර පත්රයක් නොමැතිව ඇතුල්වීම, වනජීවීන්ට හානියක් කළ හැකි ආයුධ සන්තකයේ තබාගැනීම, ජාතික වනෝද්යාන තුළ වාඩියක් තනා ගැනීම යන චෝදනා යටතේ, වැලිකන්ද වනජීවී කාර්යාලයේ අඩවි ආරක්ෂක සී.ඒ. වනසික ඇතුළු වනජීවි නිලධාරි කණ්ඩායමක් විසින් අත්අඩංගුවට ගෙන අධිකරණයට ඉදිරිපත් කරන්න තිබේ.
පොළොන්නරුව දිස්ත්රික්කයේ, වනජීවී සම්බන්ධව සිදුකළ වැටලීමකදී අත්අඩංගුවට ගෙන අධිකරණයට ඉදිරිපත් කිරිමෙන් අනතුරුව වරදකරුවන්ට ඉතිහාසයේ නියම කරනු ලැබූ වැඩිම දඩ මුදල මෙය වන බව පොළොන්නරුව සහකාර අඩවි ආරක්ෂක ආර්.ආර්. ශාන්ත සඳහන් කළේය.
එකොළොස් වෙනිදා පොළොන්නරුව මහේස්ත්රත් අධිකරණයේදී මෙම දඩ මුදල නියම වූයේ, බුත්තල අංක 01 යුදඟනාව ජනපදයේ පදිංචි, රත්නායක මුදියන්සේලාගේ අසංක ප්රදීප්, වැලිකන්ද අසේලපුර පදිංචි, කාරියප්පෙරුම මුදියන්සේලාගේ අමිත් නාමල් මදුසංක බණ්ඩාර, ඇල්පිටිය අටකොහොට පදිංචි, කග්ගොඩ ආරච්චිගේ ඉන්දික කුමාර,අසේලපුර වැලිකන්ද අංක 37 ලිපිනයේ පදිංචි,කේම්බිලි ආරච්චිගේ හේරත් බණ්ඩා, අසේලපුර මහින්දාගම අංක 192 ලිපිනයේ පදිංචි,කරුණා පේඩිගේ ජානක ඉඳුනිල් කුමාර, අසේලපුර මහින්දාගම අංක,198 ලිපිනයේ පදිංචි,හෙට්ටිආරච්චිලාගේ පුංචිනිලමේ යන අයවලුන්ටය.
