දිනසේන රතුගමගේ-
සහල් මෝල් හිමියන් ගොවීන්ගේ වී තොග මිලට ගැනීමට විවිධ තහංචි පැනවීම නිසා වවුනියාවේ පිහිටි රජයේ වී ගබඩා වලට වී අලෙවි කිරීමට ගොවීන් තුළ දැඩි උනන්දුවක් ඇති වී තිබේ.
වවුනියාවේ වී මෝල් හිමියන් මේ දිනවල සහල් නිපදවීමේ කටයුතු ඉතා අල්ප වශයෙන් සිදු කිරීමට පටන් ගෙන ඇත්තේ ඔවුන්ට හාල් තොග අඩු මිලට විකිණීමට සිදුවීම හේතුවෙනි.
මේ නිසා මෝල් හිමියන් ගොවීන්ගේ වී තොග විවිධ හේතු කියමින් හෙට්ටු කොට මිලට ගැනීමට උත්සහ කරණ අතර එහි ප්රතිපලයක් වශයෙන් මේ වන විට නාඩු වී කිලෝවක් මිලට ගැනීම රුපියල් 75 ත් 80 ත් දක්වා පහත වැටී තිබේ.
ඒ අන්දමට මිලට ගන්නා වී තොග වෙනුවෙන්ද එවේලේම මුදල් ගෙවීමක් සිදු නොවන අතර මාසයකට වඩා වැඩි කාලයක් ගොවීන්ට මුදල් ගෙවීමට කල් ඉල්ලා සිටිති.
රජයේ වී ගබඩා වලට වී අලෙවි කිරීමේදී ගොවීන්ට මුහුණ පෑමට ඇති එකම අසීරු කරුණ වී ඇත්තේ වී වල තෙතමනය 14 % කට වඩා අඩුවීම පමණක් නිසා ගොවීන් මහා මාර්ග දෙපස දමා සිය වී තොග හො ගබඩා වලට අලෙවි කිරීමට පටන් ගෙන තිබේ.
මීට පෙර වවුනියාවේ රජයේ වී ගබඩා අසල දැඩි පාලු ස්වභාවයක් ගෙන තිබුණද මේ වන විට වී තොග රැගෙන පැමිණෙන ගොවීන්ගේ වාහන පෝලිමේ ඇති අයුරුද දක්නට ලැබෙයි
