ලෝක සාමය ප්රාර්ථනා කරමින් ඇමෙරිකා එක්සත් ජනපදය පුරා සංචාරය කරන ‘සාමය සඳහා වූ පා ගමන’ (Walk for Peace) සහ ඊට වැඩම කළ මහා සංඝරත්නය පිළිගැනීමේ විශේෂ උත්සවයක් පසුගිය පෙබරවාරි 10 වන දින වොෂින්ටන් ඩී.සී. හි ශ්රී ලංකා තානාපති කාර්යාලය විසින් පවත්වන ලදී.
එක්සත් ජනපදය ඇතුළු ලොව පුරා බැතිමතුන්ගේ අවධානය දිනාගත් මෙම පා ගමනට වැඩම කළ බෞද්ධ භික්ෂූන් වහන්සේලා 200 කට අධික නමක් උදෙසා දහවල් දානය පිරිනැමීම මෙහි ප්රධාන අංගය විය.
වොෂින්ටන් ඩී.සී., මේරිලන්ඩ් සහ වර්ජිනියා යන ප්රාන්තවල වෙසෙන ශ්රී ලාංකික ප්රජාවගේ දායකත්වයෙන් ජාතික එක්සත් මෙතෝදිස්ත දේවස්ථානයේදී (National United Methodist Church) මෙම දානමය පින්කම සංවිධානය කර තිබූ අතර, ඒ සඳහා සාම්ප්රදායික ශ්රී ලාංකික ආහාර පාන සැපයීමට තානාපති කාර්යාලය පියවර ගෙන තිබුණි.
මෙම වැඩසටහනට සමගාමීව වොෂින්ටන් ජාතික ආසන දෙව්මැදුරේ (Washington National Cathedral) පැවති අන්තර් ආගමික උත්සවයක් සංවිධානය කර තිබිණි. සාම පා ගමනට සහයෝගය දැක්වීම සඳහා දෙව්මැදුර වටා දහස් සංඛ්යාත ජනතාවක් රොක්ව සිටීම විශේෂත්වයකි.
පා ගමනේ නිරත වූ මහා සංඝරත්නය තානාපති කාර්යාලය ඉදිරිපිට පිහිටි විශේෂ පිළිගැනීමේ පරිශ්රය වෙත වැඩම කළ අවස්ථාවේදී, තානාපතිවරයා ඇතුළු කාර්ය මණ්ඩලය විසින් උන්වහන්සේලා ඉතා භක්තියෙන් යුතුව පිළිගනු ලැබීය.
එහිදී තානාපති මහින්ද සමරසිංහ විසින් මහා සංඝරත්නය වෙත අටපිරිකර පූජා කළ අතර, පූජ්ය පඤ්ඤාකර හිමියන්ගේ සිවුර මත ශ්රී ලංකා ජාතික ධජය සහිත ලාංඡනයක් පැලඳවීම ද සිදු කරන ලදී.
තානාපති කාර්යාල නිලධාරීන් සහ ශ්රී ලාංකික ප්රජාව මල් පූජා කරමින් පා ගමනට ආචාර කළ අතර, එහි ගමන් ගත් සියලුම බැතිමතුන් වෙත පානීය ජලය බෙදා දීමට ද කටයුතු යොදා තිබුණි.
වැඩසටහන අවසානයේ තානාපතිවරයා ප්රමුඛ තානාපති කාර්යාල කාර්ය මණ්ඩලය සහ ශ්රී ලාංකික ප්රජාව ද භික්ෂූන් වහන්සේලා සමඟ එක්ව සාම පා ගමනේ යෙදෙමින් සිය සහයෝගීතාවය ප්රදර්ශනය කළහ.
