ශ්රියානි විජේසිංහ –
“සත්කාරයේ හිඩැස පුරවමු එක්ව ගොඩනැගෙමු ක්රියාත්මකවෙමු “ යන්න තේමාව කර ගනිමින් අද (4) ලෝක පිළිකා දිනය සමරනු ලබයි.
ඉදිරි වසර 20ක කාලය තුළදි ලොව පුරා පිළිකා රෝගීන්ගේ වැඩිවීමක් දක්නට ලැබෙන බවත් මෙසේ වැඩිවන පිළිකාවන් අතර පියයුරු, පෙනහළු, මහාන්ත්ර, ගුදමාර්ග, පුස්ථි ග්රන්ථ පිළිකා හදුන්වා දිය හැකි බවත් පිළිකා මර්දන වැඩසටහන පෙන්වාදේ.
උතුරු හා දකුණු ඇමරිකානු රටවල් වල පුරස්ථි ග්රන්ථි ආශ්රිත පිළිකාවන් ද, යුරෝපා රටවල් වල පෙනහළු පිළිකාවන්ද , දකුණු ආසියානු කලාපයේ රටවල් වල මුඛ පිළිකාවන්ද වේගයෙන් පැතිර යන බව මේ වන විට හදුනා ගෙන ඇතැයි ලෝක සෞඛ්ය සංවිධානය සඳහන් කරයි.
ලොව පුරා වාර්ෂිකව මිලියන 10ක් පමණ පිළිකාව හේතුවෙන් මිය යන බවද වාර්තා වන්නේ යැයි පිළිකා මර්දන වැඩසටහනේ ප්රජා වෛද්ය විශේෂඥ සුරාජ් පෙරේරා පවසා සිටියි.
වාර්ෂිකව මෙරටින් පිළිකා රෝගීන් 37000 – 40000 අතර සංඛ්යාවක් වාර්තාවන අතර දිනකට රෝගීන් 103 දෙනෙකු හදුනා ගන්නා බවත් පිළිකා රෝගීන් 42ක් දිනකට මිය යන බවත් ඒ මහතා කියා සිටියි.
කෙසේ නමුත් රෙජිස්ටාර් ජෙනරාල් දෙපාර්තමේන්තුව නිකුත් කළ වාර්තාවට අනුව වසර 2019ී මෙරට පිළිකා රෝගින් 15 598ක් දෙනා මිය ගොස් ඇති බවත් ඉන් 5000ක පිරිසකගේ මරණය සිදුව ඇත්තේ රෝහල් ආශ්රිතව බවත් වාර්තා වේ. ඉතිරි පිරිස ක්ෂේත්රය තුළදි මරණයට පත්ව ඇති බවත් සදහන් කර ඇත.
පිරිමින් අතර වැඩි වශයෙන්ම වාර්තා වන්නේ මුඛ පිළිකාව වන අතර එය සියයට 13ක් වන බවත් මීට අමතරව පෙනහළු , මහාන්ත්ර , ගුමාර්ග සහ ගලනාල පිළිකාවන්ද පිළිවෙලින් වර්ධනය විමක්ද දක්නට ලැබෙන බවත් පැවසේ.
කාන්තාවන් අතර පැතිර යන පිළිකාවන්ගෙන් ¼ ක්ම එනම් 27%ක්ම පියයුරු පිළිකාවන් වන අතර මීට අමතරව මහාන්ත්ර, ඩිම්බකෝෂ, ගැබ්ගෙල සහ මහාන්ත්ර පිළිකාවන් දැකිය හැකි බවද පැවසේ.
