තම සෙසු සිසුන්ගේ ආකර්ශනීය බව ශ්‍රේණිගත කිරීම සඳහා වෙබ් අඩවියක් නිර්මාණය කිරීමට විශ්ව විද්‍යාල දත්ත සොරකම් කළ බවට සැකපිට විද්‍යාල උපාධිධාරියෙකු චීනයේ පොලිසිය විසින් රඳවාගෙන ඇති බව සී.එන්.එන් පුවත් සේවය වාර්තා කරයි.
ඒ අනුව චීනය පොලිසය විසින් ඊයේ (10) නිකුත් කරන ලද පොලිස් ප්‍රකාශයකට අනුව, “මා“ යන වාසගමෙන් හඳුනාගෙන ඇති 25 හැවිරිදි මෙම තරුණයා බීජිං හි කීර්තිමත් රෙන්මින් විශ්ව විද්‍යාලයේ උපාධිධාරියෙකි.
අදාල තරුණයා අදාල විශ්ව විද්‍යාලයේ ශිෂ්‍යයෙකුව සිටියදී විශ්ව විද්‍යාලයේ දත්ත ගබඩාවෙන් ශිෂ්‍යයින්ගේ පුද්ගලික තොරතුරු සොරකම් කළ බවට ඉකුත් සති අන්තයේ අන්තර්ජාල ඔස්සේ කීපදෙනෙකුම පළ කිරීම් කිහිපයක් කරමින් අදාල තරුණයාට චෝදනා කර ඇත.
අන්තර්ජාලය ඔස්සේ චෝදනා කරන ලද පිරිස් පවසා ඇත්තේ අදාල තරුණයා විසින් එම විශ්ව විද්‍යාලයේ උපාධි අපේක්ෂකයින් සහ අධ්‍යාපනය සම්පූර්ණ කළ සිසුන්ගේ ශාරීරික පෙනුම ශ්‍රේණිගත කරන වෙබ් අඩවියක් නිර්මාණය කිරීමට දත්ත භාවිතා කර ඇති බවයි. ඒ අනුව මේවන විට ක්‍රියා විරහිත අදාල වෙබ් අඩවියේ ඡායාරූප ඔස්සේ ශිෂ්‍යයින්ගේ නම්, ශිෂ්‍ය හැඳුනුම්පත්, උපන් දින සහ ඔවුන්ගේ ඡායාරූප සමඟ වූ පුද්ගලික තොරතුරු රැසක් අදාල වෙබ් අඩවියේ පෙන්නුම් කර ඇති අතර එම සාධක සියල්ල පදනම් කරගෙන එම සිසුන් හට ශ්‍රේණිගත් කිරීමක් ලබා දී ඇති බවටද වාර්තාවේ.
සිද්ධිය සම්බන්ධයෙන් විශ්ව විද්‍යාල නිවේදනයක් නිකුත් කරමින් සඳහන් කර සිටියේ අදාල දත්ත සොරා ගැනීම් පිළිබඳව පොලිසිය දැණුම්වත් කර අදාල නීතිමය ක්‍රියාමාර්ග ගැනීමට පියවරගෙන ඇති බවයි.
කෙසේ වෙතත් ඇතැම් පිරිස් විසින් මෙම සැකකාර තරුණාය ෆෙස් බුක් නිර්මාතෘ මාක් සකර්බර්ග්ට සමාන කර ඇති අතර එහිදී ඔවුන් පෙන්වා දී ඇත්තේ සකර්බර්ග් මෙන්ම ඔහු කටයුතු කර ඇති බවයි.
