මහියංගනය ආදිවාසී ගම්මානයේ පුද්ගලයෙකු විසින් කෝටි 30 කට විකිණීම ට සැලසුම් කළ ගජමුතු 30 ක් , ඇත්දළ කුඩා කොටසක්, කොටි සම් කොටස්, කොටි තෙල් ඇතුළු වනසත්ත්ව හා වෘක්ෂලතා ආරක්ෂක ආඥා පනතින් දැඩි ලෙස ආරක්ෂිත කළුවර ලී කොටස් 07 ක් දඹ ලී කොටස් 35 ක් දුර්ලභ දැව විශාල ප්රමාණයක් වනජීවී දෙපාර්තමේන්තුව විසින් අත් අඩංගුවට ගෙන තිබේ.
මෙම වැටලීම ඉතිහාසයේ වැඩිම ගජමුතු ප්රමාණයක් අත්අඩංගුවට ගත් අවස්ථාව බව වනජීවී දෙපාර්තමේන්තුව කියයි.
පෙබරවාරි මස සිට සැලසුම් සකස් කර උපාය දූතයන් යොදවා ගුවන් හමුදා බුද්ධි අංශයේ සහය ද ඇතිව වනජීවී නිලධාරීන් විසින් සිදුකළ ආයාසකර මෙහෙයුමකින් පසු මෙම දුර්ලභ මෙන්ම අතිශය වටිනා තහනම් ද්රව්ය තොගය සහ සැකකරුවන් කොටු කරගැනීමට කටයුතු කර ඇත.
සැකකරු සමග කොටන තුවක්කුවක් සකස් කිරීමට ගන්නා අමතර කොටස්, මදු සකස් කිරීමට ගන්නා කේබල් ඇතුළු නීතිවිරෝධී උපකරණ රැසක් ද වනජීවී භාරයට ගෙන ඇත.
මේ වනවිට එම සැකකරු ගිරාඳුරුකෝට්ටේ අලි පාලන ඒකකයට රැගෙනවිත් වැඩිදුර විමර්ශන කටයුතු සිදුකරන බව වනජීවී දෙපාර්තමේන්තු ආරංචි මාර්ග කියයි.
සැකකරු හෙට දින (18 )මහියංගනය මහේස්ත්රාත් අධිකරණය වෙත නඩුභාණ්ඩ සමග සැකකරු ඉදිරිපත් කිරීමට නියමිත ය. සැකකරු ජීවත්වන මෙම ආදිවාසී ගම්මානය පිහිටා ඇත්තේ මාදුරුඔය ජාතික උද්යානය ආසන්නයේ බැවින් ඔහු විසින් දියත් කර තිබූ ගජමුත් සහ වටිනා දැව ජාවාරම ජාතික උද්යානය තුළ සිදුවූවක් ද යන්න පිළිබඳ සොයා බැලීමට විමර්ශන ක්රියාත්මක බව වන ජීවී දෙපාර්තමේන්තුව කියයි.
මෙම වැටලීම වනජීවී අධ්යක්ෂ ජනරාල් රන්ජන් මාරසිංහ , අනුරාධපුර සහකාර අධ්යක්ෂ කේ.එස්.චන්ද්රරත්න , මධ්යම සහකාර අධ්යක්ෂ එස්.ජී.වික්රමතිලකගේ උපදෙස් පරිදි රිටිගල අඩවි ආරක්ෂක කාර්යාලයේ වනසත්ත්ව අඩවි ආරක්ෂක ඩී.රාමසිංහගේ මෙහෙයවීමෙන් කුකුල්කටුව බීට්ටු කාර්යාලයේ වනසත්ත්ව අඩවි සහකාර කේ.පී.උදය කරුණානායක, රිටිගල අඩවි ආරක්ෂක කාර්යාලයේ වනසත්ත්ව අඩවි සහකාරවරුන් වන එස්.ආර්.එම්.අධිකාරී හා ඩබ්.එම්.ඒ.බී.විජේසිංහ , මහියංගනය අලි පාලන ඒකකයේ වනජීවී නියාමක ඩබ්.එම්.ජේ.සඳනුවන් , රිටිගල අඩවි ආරක්ෂක කාර්යාලයේ වනජීවී නියාමක එස්.එම්.එස්.කේ.සෙනෙවිරත්න හා ජී.ඩබ්.ජී.සම්පත් ගීත් රත්නවීර ඇතුළු වනජීවී නිලධාරින් විසින් සිදුකර ඇත.
