දීර්ඝ කාලයකට පසුව රුපියලේ අගය ඇමෙරිකානු ඩොලරයට සාපේක්ෂව ඉහළ නැග ඇති අතර අද දිනයේ ඇමෙරිකානු ඩොලරයේ ගැනුම් මිල රුපියල් 343.97ක් වූ අතර විකිණුම් මිල 356.73 ලෙස වාර්තා විය. මහ බැංකුවේ දත්තවලට අනුව, ඊයේ දිනයේ ඇමෙරිකානු ඩොලරයක ගැනුම් අනුපාතිකය රුපියල් 351.72 ක් වූ අතර විකුණුම් මිල වූයේ රුපියල් 362.95 කි.
ඩොලරයට සාපේක්ෂව රුපියලේ අගය ඉහළ යාමට ආසන්නතම හේතුව ලෙස විනිමය හුවමාරු වෙළෙඳපෙල විශ්ලේෂකයන් සඳහන් කරන්නේ ශ්රී ලංකා මහ බැංකුව විසින් ඩොලරයේ ගැනුම් සහ විකිනුම් මිල අතර පරාසය රුපියල් 2.60 සිට රුපියල් 7.50 දක්වා ඉහළ නැංවීම බව ය.
ශ්රි ලංකා මහ බැංකු අද නිවේදනය කළේ ඇමෙරිකානු ඩොලරයට සාපෙක්ෂව රුපියලේ අගය 353.65ක මධ්ය අගයක තබා රුපියල් 7.50ක ඉහළ හෝ පහළ ආන්තික අතර ගැනම් සහ විකිණුම් සිදු කරන ලෙසය.
2022 මාර්තු මාසයේ සිට රුපියල පාවෙන අගයකට පත් කිරීමෙන් පසුව රුපියලේ අගය රුපියල් 203 සිට රුපියල් 360 දක්වා කඩා වැටුණි. පසුව මහ බැංකුව එක්සත් ජනපද ඩොලරයට රුපියල 360 දක්වා අඩු කර අන්තර් බැංකු මත පදනම් වූ මාර්ගෝපදේශ අනුපාතයක් හඳුන්වා දුන්නේය.
මහ බැංකුව අද සියලුම බලපත්ර ලාභී බැංකුවලට උපදෙස් දුන්නේ ඇමෙරිකානු ඩොලර් සහ රුපියල් අතර අන්තර් බැංකු ගනුදෙනුවල මධ්යස්ථ විනිමය අනුපාතිකය ලෙස රුපියල් 353.65ක් භාවිතා කරන ලෙසත්, එම අගයේ සිට රුපියල් 7.50ක් ඉහළ හෝ පහළ පරාසයක් තුළ පවත්වාගෙන යන ලෙසත්ය.
මෙයට අමතර ව පසුගිය වසරට සාපෙක්ෂව විදේශ මුදල් මෙරට බැංකු පද්ධතිය වෙත ලැබීම ද විනිමය වෙළෙඳපොළේ සුබදායී වර්ධනයට හේතු වී ඇති අතර මහ බැංකුව පසුගියදා සියලුම බැංකුවලට තමන්ට ලැබෙන ඩොලර් සංචිතවලින් මසකට අනිවාර්යයෙන් මහ බැංකුවට ලබා දිය යුතු ප්රතිශතයද සියයට 25 සිට සියයට 15ක් දක්වා පහත හෙළීමට ක්රියා කළේය.
බැංකු අංශයේ මූලාශ්රවලට අනුව, අන්තර් බැංකු විදේශ විනිමය වෙළෙඳපොළේ සාමාන්ය දෛනික පරිමාව දැන් ඇමෙරිකානු ඩොලර් මිලියන 42ක් පමණ වන අතර එය 2022 මැයි/ජුනි මාසවල ඇමෙරිකානු ඩොලර් මිලියන 8-10 පමණ වූ බව වෙළෙඳපොල ආරංචි මාර්ග පවසයි.
