මේ වනවිට රට මුහුණ දී ඇති ආර්ථික අර්බුදය දළදා ප්රදර්ශනයකින් යටපත් කිරීමට ජනාධිපතිවරයා උත්සාහ දරමින් සිටිය දී දළදා ප්රදර්ශනවලින් එවැනි තත්ත්වයක් යටපත් කළ නොහැකි බව සේපාල් අමරසිංහ සිය ප්රකාශයෙන් පෙන්වා දුන්නේ යැයි ඔහු වෙනුවෙන් පෙනී සිටි නීතිඥ නාමල් රාජපක්ෂ අද අධිකරණයේ දී කියා සිටියේය.
නීතිඥවරයා පැවසුවේ සිය සේවා දායකයා විෂයෙහි මේ ක්රියාත්මක වී ඇත්තේ දේශපාලන පළිගැනීමක් බවය.
සේපාල් අමරසිංහ අද (06) දහවල් කොළඹ අතිරේක මහේස්ත්රාත් අධිකරණය වෙත ඉදිරිපත් කරනු ලැබූ අවස්ථාවේ නීතිඥවරයා මේ බව අධිකරණයට ප්රකාශ කළේය.
අපරාධ පරීක්ෂණ දෙපාර්තමේන්තුවේ නිලධාරීන් අධිකරණය ඉදිරියේ කරුණු දක්වමින් කීවේ බෞද්ධ කටයුතු දෙපාර්තමේන්තුවේ අධ්යක්ෂ ජනරාල්වරයා සහ බෞද්ධ තොරතුරු කේන්ද්රයේ අධ්යක්ෂ පූජ්ය අගුලුල්ලේ ජිනාන්ද හිමියන් පොලිස්පතිවරයාට කළ පැමිණිල්ලකට අනුව මෙම විමර්ශන ආරම්භ කළ බවය.
සැකකරු විසින් පවත්වාගෙන යන යූ ටියුබ් නාලිකාව ඔස්සේ ඔහු විසින් කළ ප්රකාශක් නිසා බෞද්ධ සමාජය කම්පාවට සහ දැඩි කැළඹීමට පත්ව තිබෙන බව අපරාධ පරීක්ෂණ දෙපාර්තමේන්තුවේ නිලධාරීහු කීහ.
මෙම ප්රකාශය සම්බන්ධව සමාජ මාධ්ය තුළ ද දෙපාර්ශවයක් අතර යුදමය තත්ත්වයක් නිර්මාණය වී ඇති බවත් ඔවුහු අධිකරණයට වාර්තා කළහ.
මෙම ප්රකාශයෙන් බරපතල වරදක් කර ඇති බව පුරාවිද්යා අධ්යක්ෂ ජනරාල්වරයා විසින් ද අපරාධ පරීක්ෂණ දෙපාර්තමේන්තුව දැනුම්වත් කර ඇති බව අපරාධ පරීක්ෂණ දෙපාරත්මේන්තුවේ නිලධාරීහු අධිකරණයට පැවසූහ.
මල්වතු අස්ගිරි දෙපාර්ශවයේ මහා නායක හිමිවරු හා දියවඩන නිලමේවරයා මේ සිද්ධිය සම්බන්ධයෙන් ප්රකාශ ලබා දීමට සූදානමින් සිටින බවත් ඔවුහු අධිකරණයට දැන්වූහ.
සේපාල් අමරසිංහගේ පරිගණකය අත්අඩංගුවට ගත් බවත් ඔහුට විදේශ රටවලින් මුදල් ලැබෙමින් තිබුණු බවට හෙළිදරව් වී ඇති බවත් අධිකරණයට දැන්වූ අපරාධ පරීක්ෂණ දෙපාර්තමේන්තුව කීවේ ත්රස්තවාදීන් සඳහා මුදල් ආධාර ලබා දීම හා මුදල් විශුද්ධිකරණය වැලැක්වීමේ නෛතික ප්රතිපාදන යටතේ විමර්ශන ආරම්භ කර තිබෙන බවය.
සේපාල් අමරසිංහ කළ ප්රකාශය මුල්කරගනිමින් බෞද්ධ ජන සමාජය තුළ විශාල කැළඹීමක් ඇති වි තිබෙන නිසා සැකකරු සිවිල් හා දේශපාලනය පිළිබඳ සම්මුති පනත යටතේ එළඹෙන 19 දක්වා රක්ෂිත බන්ධනාගාරගත කරන ලෙස අධිකරණයෙන් ඉල්ලා සිටියේය.
එහෙත් මහේස්ත්රාත්වරිය අපරාධ පරීක්ෂණ දෙපාර්තමේන්තුවේ ඉල්ලීම ඉවත දමා ලබන 10 වැනිදා දක්වා සේපාල් අමරසිංහ රක්ෂිත බන්ධනාගාරගත කිරීමට නියෝග කරමින් ඔහුට අවවාද කළේ දළදා වහන්සේ මේ රටේ භක්තිමත් බෞද්ධ ජනතාවගේ මුදුන්මල්කඩ බැවින් මෙවැනි ප්රකාශ කිරීමේ දී වඩාත් ප්රවේසම් වන ලෙසය.
