දැනට විදේශගතව සිටින ප්රසිද්ධ සංවිධානාත්මක අපරාධකරුවෙකු වන කෙහෙල්බද්දර පද්මේගේ කල් ඉකුත් වූ විදේශ ගමන් බලපත්රය වෙනුවට ව්යාජ විදේශ ගමන් බලපත්රයක් නිර්මාණය කිරීම සඳහා පහසුකම් සැලසීම සම්බන්ධයෙන් සැකපිට ජ්යෙෂ්ඨ ආගමන නිලධාරියෙකු අත්අඩංගුවට ගෙන තිබේ.
සැකකරු ආගමන හා විගමන සහකාර පාලක ජෙනරාල්වරයෙකි.
අපරාධ විමර්ශන දෙපාර්තමේන්තුවට අනුව, දැනට විදේශගතව සැඟවී සිටින කෙහෙල්බද්දර පද්මේ ගේ ජෛවමිතික ඇඟිලි සලකුණු දත්ත නොමැතිව ව්යාජ විදේශ ගමන් බලපත්රය නිකුත් කිරීමට මෙම සැකකරු කටයුතු කර ඇති බවට අනාවරණය වී ඇත.
බලධාරීන් තහවුරු කළේ 2014 දී නිකුත් කරන ලද විදේශ ගමන් බලපත්රයක් භාවිතා කරමින් කෙහෙල්බද්දර පද්මේ මුලින් 2021 දී විදේශගත වී ඇති බවත්, එය පසුගිය වසරේ කල් ඉකුත් වූ බවත්ය. නව ගුවන් ගමන් බලපත්රයක් නිකුත් කර ඇත්තේ එම කල් ඉකුත් වූ ගුවන් ගමන් බලපත්රයටය.
මෙම සිද්ධිය සම්බන්ධයෙන් ආගමන විගමන දෙපාර්තමේන්තුවේ තවත් සැකකරුවන් දෙදෙනෙකු මීට පෙර අත්අඩංගුවට ගෙන ඇති බවත් ඔවුන්ගෙන් කරන ලද ප්රශ්න කිරීම්වලට අනුව සැකකාර ආගමන විගමන සහකාර පාලක ජනරාල්වරයා අත් අඩංගුවට ගත් බවත් අද පොලිස් මාධ්ය ප්රකාශක බුද්ධික මනතුංග දෙරණ බිග් ෆෝකස් වැඩසටහනේ දී ප්රකාශ කළේය.
“කෙහෙල් බද්දර පද්මේ කියන අපරාධකරු විදේශගත වෙලා ඉන්නේ. ඔහුට පාස්පෝට් එකක් ලංකාව තුළ හැදීම කළ හැකි කාරණයක් නෙමෙයි. මොකද පාස්පෝට් එකක් හදන්න නම් අදාල පුද්ගලයා භෞතිකව රටේ පෙනී සිටිය යුතුයි. එසේ නොවී සිදුවුන අවස්ථාවක් තමයි මේ හෙළිදරවු වුනේ. මේ සියල්ලම හෙළිදරවු වන්නේ විමර්ශනයක ප්රතිඵල ලෙසයි.”
“අප මෙය තේරුම් ගත යුතුයි මේ හැම ආයතනයකම ඉන්නවා මුදලට සියල්ල පාවා දෙන දූෂිතයින්. පොලිසිය තුළත් ඉන්නවා මේ විදිහට මුදලට කටයුතු කරන අය. එවැනි පුද්ගලයෙක් හිටියා කියන එක එම ආයතනයේ ස්වරූපය නෙමෙයි. ආයතනය ක්රියාත්මක වෙන්නේ රටේ නීතියට අනුව. ඒකට අනුකූල නැති කීප දෙනෙක් හැම ආයතනයකම ඉන්නවා. එවැනි පුද්ගලයො ආගමන විගමන දෙපාර්තමේන්තුවේ , පොලිසියෙ විතරක් නෙමෙයි, නීතිපති දෙපාර්තමේන්තුවේ, අධිකරණයේත් ඉන්න පුලුවන්. ඒ අය කරන අපරාධ සම්බන්ධව තමයි අපි විමර්ශනය කරන්නේ.”
කෙහෙල් බද්දර පද්මේට ගුවන් ගමන් බලපත්රය හැදූ මෙම පුද්ගලයින් WhatsApp හරහා කෙහෙල්බද්දර පද්මේගේ ඡායාරූපය ලබාගෙන, එය සංස්කරණය කර, ව්යාජ විදේශ ගමන් බලපත්රය සැකසීමට ආගමන හා විගමන දෙපාර්තමේන්තුවට ඉදිරිපත් කළ බව කියනු ලැබේ.
කෙසේ වෙතත්, මෑත කාලීන සොයාගැනීම්වලින් පෙනී යන්නේ මෙම වසරේ දී පද්මේ වෙනුවෙන් තවත් ව්යාජ විදේශ ගමන් බලපත්ර දෙකක් විවිධ නම් යටතේ නිකුත් කර ඇති බවය.
එමෙන්ම ඒ දෙකෙහිම කෙහෙල්බද්දර පද්මේගේ ඡායාරූපය අඩංගු බවත්ය.
