ඉන්දියානු සමාගමක් හා එක්ව මෙරට ජනතාවට විද්යුත් හැඳුනුම්පත් ලබා දීමේ වැඩසටහන පිළිබඳව නැවත සලකා බලන්නැයි පෙරටුගාමී සමාජවාදී පක්ෂයේ අධ්යාපන ලේකම් පුබුදු ජයගොඩ රජයෙන් ඉල්ලීමක් කරයි.
දත්ත මත සියල්ල තීන්දුවන ලෝකයක රටක පුරවැසියන්ගේ සියලුම දත්ත වෙනත් රටක් වෙත ලබා දෙන්නේ නම් එම ජාතිය යටත් කරගැනීමට තුවක්කු අවශ්ය නැති බවත් ජාතියේ ස්වයිරීත්වය සහ ජාතික ආරක්ෂාව සම්බන්ධ බරපතල අවදානමක් සහිත මේ අවස්ථාව පාර්ලිමේන්තුවේ දී හෝ කතා කර තීන්දුවක් ගන්නා ලෙසත්ය.
” මේ ඩිජිටල් හැඳුනුම්පතට ලංකාවේ ජනතාවගේ බයෝ ඩේටා, ඒ කියන්නේ ජීව දත්ත පමණක් නෙමෙයි, බයෝ මෙට්රික්ස්, ඒ කියන්නේ ජෛව මිතික ලක්ෂණ අඩංගු වෙනවා. එතකොට මේ හැදුනුම්පත නිකුත් කිරීම සඳහා ඉන්දියානු සමාගමකට ලබා දෙනකොට ඒකෙ අර්ථය තමයි රටේ ජනතාවගේ සියලුම දත්ත ඉන්දියාව සතු වෙනවා කියන එක.”
” මේක අපේ රටේ ජාතික ආරක්ෂාවට තර්ජනයක්, අපේ රටේ ජනතාවගේ ආරක්ෂාවට තර්ජනයක්, ඒ වගේම මේක අපේ රටේ අනාගතය පිළිබඳ බරපතල තර්ජනයක්.”
“මොකද මේ යුගයට කියන්නේ දත්තවල යුගය කියලා. යම් රටක් සතුව වෙන රටක පුරවැසියන්ගේ දත්ත තියනවා කියන්නෙ ආයුධ ඕන නෑ ඒ රට යටත් කරන්න. ඒ රටේ ආර්ථික ස්වයිරීත්වය, ඒ රටේ දේශපාලන ස්වාධිපත්ය නැති කරන්න ආයුධ ඕන වෙන්නේ නෑ. ”
” ඒ නිසා අපි ආණ්ඩුවෙන් ඉල්ලනවා මේ එකඟතාවය නැවත සමාලෝචනය කරන්න. ලංකාවේ ජනතාවට හානිකර මෙවැනි ගිවිසුම් මොනම හෝ ආකාරයකට එළඹෙනවා නම් පැරණි ගිවිසුම් බලාත්මක කරනවා නම් ඒ සම්බන්ධව පර්ලිමේන්තුව ඇතුළෙවත් අවම වශයෙන් සාකච්ඡා කර තීන්දුවක් ගත යුතුයි. ” පුබුදු ජයගොඩ පැවසුවේය.
