-
ද්විපාර්ශ්වික සබඳතා ශක්තිමත් කිරීම සහ විදේශගත සේවක සුබසාධනය වෙත විශේෂ අවධානය යොමු කරන්න… රටට අවශ්ය ඍජු ආයෝජන අවස්ථා සකස් කිරීම සහ විදේශ අපනයන වෙළෙඳපල අවස්ථා සොයා ගැනීම තානාපති වගකීමක්… නව රාජ්ය තාන්ත්රිකයින් පත් කරමින් ජනපති පවසයි!
ජාත්යන්තරය හමුවේ ශ්රී ලංකාවේ ප්රතිරූපය ඔසවා තැබීම තානාපතිවරයා සතු වගකීමක් බවත්, පසුගිය කාලයේ රාජතාන්ත්රික සේවාවන්හි නිරත නිලධාරීන් ශ්රී ලංකාවේ නාමය අපකීර්තියට පත් කළ ආකාරයේ සිදුවීම් නව පත්වීම් ලබා ගන්නා රාජ්ය තාන්ත්රිකයන්ගෙන් බලාපොරොත්තු නොවන බවත් ජනාධිපති අනුර කුමාර දිසානායක පැවසුවේය.
ජනාධිපතිවරයා මෙම අදහස් පළ කළේ විදෙස් තානාපති සේවය සඳහා නව රාජ්ය තාන්ත්රිකයින් පත් කිරීම වෙනුවෙන් ජනාධිපති කාර්යාලයේ අද (07) පැවති සාකච්ඡාවේදීය.
විදේශගත ශ්රී ලාංකිකයින්ට සපයනු ලබන සේවාව පිළිබඳ විශේෂ අවධානයක් යොමු කර කටයුතු කරන ලෙසත් එම රටවල සිටින සියළු ශ්රී ලාංකිකයන්ට සේවා සැපයීමේදී ඒ සඳහා මූලිකත්වය දෙමින් කිසිදු භේදයකින් තොරව සාධාරණව කටයුතු කරන ලෙසත් ජනාධිපතිවරයා නව රාජ්ය තාන්ත්රිකයන්ට උපදෙස් ලබා දුන්නේය.
ශ්රී ලාංකික ශ්රමිකයින් සිටින මැද පෙරදිග, දකුණු කොරියාව සහ ජපානය වැනි රටවල රාජ්යතාන්ත්රික සේවා සැපයීමේදී වැඩි අවධානයක් යොමු කළ යුතු බවද මෙහිදී ජනාධිපතිවරයා අවධාරණය කළේය.
ඍජු විදේශ ආයෝජන ආකර්ෂණය කර ගැනීම සඳහා තිබෙන අවස්ථා ප්රමාණය වැඩි කර ගැනීම මෙන්ම ශ්රී ලංකාවේ සිටින ආයෝජකයන්ට නව වෙළඳපොළ අවස්ථා සොයා ගැනීම රාජතාන්ත්රික සේවාව හරහා සිදු කළ හැකි බව ජනාධිපති අනුර කුමාර දිසානායක කියා සිටියේය.
ශ්රී ලංකාවේ ආර්ථිකය නගා සිටුවීම සඳහා සෘජු විදේශ ආයෝජන කැඳවා ගෙන ඒම තානාපතිවරයාට පැවරෙන ප්රධාන වගකීමක් බවත් ඒ සඳහා අවශ්ය සහයෝගය ලබා දීමට රජය සූදානම් බවත් ජනාධිපතිවරයා සඳහන් කළේය.
ජනාධිපති අනුර කුමාර දිසානායක විදේශ තානාපති සේවය සඳහා තානාපතිවරු 04 දෙනෙකු සහ මහ කොමසාරිස්වරයකු පත් කර ඇත.
රාජ්ය තාන්ත්රික සේවයේ වසර විස්සකට වඩා පළපුරුද්ද හා අත්දැකීම් සහිත නිලධාරීන් පිරිසක් මෙලෙස නව රාජ්ය තාන්ත්රිකයින් ලෙස පත් කර තිබේ.
ඒ අනුව පත් කර ඇති නිලධාරීන් මෙසේය.
- කටාර් රාජ්ය යේ තානාපති – ආර්.එස්.ඛාන් අසාඩ්
රුසියානු තානාපති – එස්.කේ. ගුණසේකර
කුවේට් තානාපති – එල්.පී. රත්නායක
ඊජිප්තු තානාපති – ඒ.එස්.කේ. සෙනෙවිරත්න
නවසීලන්ත මහ කොමසාරිස් – ඩබ්ලිව් .ජී.එස්. ප්රසන්න
ජනාධිපති ලේකම් ආචාර්ය නන්දික සනත් කුමානායක , ජනාධිපති ජ්යෙෂ්ඨ අතිරේක ලේකම් රෝෂන් ගමගේ මෙම අවස්ථාවට එක්වූහ.
