දිනසේන රතුගමගේ –
දකුණු ඉන්දීය සුපිරි ගායක හරිහරන්ගේ ප්රධාන සහභාගීත්වයෙන් යාපනයේ මූත්තවේලී ක්රීඩාංගණයේදී පැවති සංගීත ප්රසංගයට පොලිස් අණ නොතකා බාධක බිඳගෙන ඇතුළු වූ අධික ජනකායක් නිසා ඇතිවූ තෙරපීමෙන් දෙදෙනෙකු ක්ලාන්ත වී තවත් හතර දෙනෙකු ඊයේ ( 9 ) සුළු තුවාල ලබා තිබේ.
එම ක්රීඩාංගණයේ සිටිය හැකි ප්රේක්ෂක ප්රමාණයට වඩා අධික පිරිසක් ක්රීඩාංගණයට ඇතුළු වීම නිසා මේ තත්ත්වය උදගත වී තිබුණි.
පොලීසිය මුලින්ම ජනතාව පාලනය කොට සීමා සහිත ප්රමාණයක් ක්රීඩාංගණයට ඇතුළු කොට සිටියදී තරුණයින් විශාල පිරිසක් පොලිස් බාධක බිද දමා ගෙන ක්රීඩාංගණය තුළට පැමිණීම නිසා ජනතාව තෙරපී එකිනෙකා උඩ ඇද වැටී ඇත.
මේ අවස්ථාවේදී ප්රසංගය තාවකාලිකව නතර කිරීමට පියවර ගත් සංවිධායක මණ්ඩලය ශබ්ද වාහීනී යන්ත්ර මාර්ගයෙන් ජනතාවට නිවේදන නිකුත් කරමින් ජනතාව පාලනය කොට ඇත.
මේ ආකරයට හරිහරන්ගේ සංගීත ප්රසංගය අවස්ථා තුනක්ම වරින් වර නතර කිරීමට සංවිධායකයින්ට සිදුව ඇත.
මේ අතර ක්රීඩාංගණයේ කලහාකාරී ලෙස හැසුරුණු පිරිසක් පුටු වතුර ටැංකි යතුරු පැදි හා සැරසිලි වලට ප්රහාර එල්ල කිරීම නිසා රුපියල් ලක්ෂ ගණනක දේපල වලට හානි සිදුව තිබේ.
හරිහරන්ගේ සංගීත ප්රසංගයට දකුණු ඉන්දීය සුපිරි නිළි තමන්නා ,රම්බා ඇතුළු නිළියන් කීප දෙනෙකුම පැමිණ සිටි නිසා වවුනියාව ත්රීකුණාමළය වැනි පළාවල සිටද නරඹන්නන් යාපනයට ගොස් සිටියහ.
ක්රීඩාංගණයේ ඉඩකඩ ප්රමාණවත් නොවීම නිසා බොහෝ පිරිසක් ක්රීඩාංගණය අසල ගස් වල හා වෙනත් ආධාරක මතට නැගී ප්රසංගය නරඹා ඇත.
