නාවික හමුදාව, වෙරළ ආරක්ෂක දෙපාර්තමේන්තුව හා එක්ව, ඊයේ (25) රාත්රී කාලයේ සහ අද (26) අළුයම මන්නාරමට උතුරින් වූ ශ්රී ලංකාවට අයත් මුහුදු සීමාවේ සිදුකළ විශේෂ සෝදිසි මෙහෙයුමක් මඟින්, මෙරට මුහුදු සීමාව තුළ අනවසර ධීවර කටයුතු සිදු කළ ඉන්දීය ධීවර යාත්රා තුනක් (03) සමඟ ඉන්දීය ධීවරයින් තිස් තුන් දෙනෙකු (33) අත්අඩංගුවට ගෙන ඇත.
ඊයේ දින රාත්රි කාලයේ සහ අද අළුයම තලෛමන්නාරමට උතුරින් වූ ශ්රී ලංකා මුහුදු සීමාවට ඇතුළු වී අනවසර ධීවර කටයුතු සිදුකළ ඉන්දීය ධීවර යාත්රා රැසක් උතුරු මැද නාවික විධානය මඟින් නිරීක්ෂණය කර, එම ධීවර යාත්රා මෙරට මුහුදු සීමාවෙන් ඔබ්බට පලවා හැරීමේ විශේෂ මෙහෙයුමක් දියත් කර තිබිණි.
උතුරු නාවික විධානයට හා වෙරළ ආරක්ෂක දෙපාර්තමේන්තුවට අනුයුක්ත වේග ප්රහාරක යාත්රා සහ උතුරු මැද නාවික විධානයට අනුයුක්ත වෙරළ බඩ මුර යාත්රා මෙම මෙහෙයුම සඳහා නාවික හමුදාව විසින් යොදා ගත්තේය.
එසේ තිබියදීත් තව දුරටත් ශ්රී ලංකා මුහුදු සීමාවේ අනවසර ධීවර කටයුතු සිදු කරමින් සිටි ඉන්දීය ධීවර යාත්රා තුනක් (03) සමඟ ඉන්දීය ධීවරයින් තිස් තුන් දෙනෙකු (33) මෙලෙස අත්අඩංගුවට ගැනීමට කටයුතු කර තිබිණි.
මෙම මෙහෙයුම මඟින් අත්අඩංගුවට ගත් ඉන්දීය ධීවර යාත්රා තුන (03) සහ එහි සිටි ඉන්දීය ධීවරයින් තිස්තුන් දෙනා (33) ඉරණතිව් දූපත වෙත රැගෙන ආ අතර, ඉදිරි නීතිමය කටයුතු සඳහා කිළිනොච්චිය සහකාර ධීවර අධ්යක්ෂක කාර්යාලය වෙත භාර දීමට නියමිතව ඇත.
