මනම්පිටිය නිමල් ජයරත්න
පොළොන්නරුව මහවැලි බි කලාපයේ දිඹුලාගල මහවැලි කොට්ඨාසයේ පළමුවරට මැද කන්නයේ වගා කරන ලදී කුඹුරු වල වී අස්වනු නෙළීමත් සමග රජයේ සහතික මිලට වී ලබාගැනීම වැඩපිළිවෙළ ක්රියාත්මක නොවීම නිසා පොළොන්නරුවේ මහා පරිමාණ ව්යාපාරිකයින් වී මිල පහත දමා කුණු කොල්ලයට වී ගැනීම ආරම්භ කර ඇතැයි ගොවීහු පවසති.
මෙවර දිඹුලාගල මහවැලි කොට්ඨාසයට අයත් ඉද්දෙපිච්ච වැව බෙදුම්මල ගොවිසංවිධානය මගින් කුඹුරු අක්කර 700 කට ආසන්න සංඛ්යාවක් පළමුවරට මැද කන්නයේ වගා කෙරඅතර එම වී අස්වනු නෙළීමත් සමග පොළොන්නරුව ඇතුළු අවට ප්රදේශවල වී මෝල් හිමිකරුවන් වේලන ලද නාඩු වි කිලොවක් රුපියල් 110 කටත් අමු නාඩු වි කිලෝවක් රුපියල් 108 කටත් මිලදී ගැනීමට පෙළඹී ඇති බව ගොවීහු.
එලෙස තුට්ටු දෙකට ලබාගන්නා වී තොග සහල් බවට පත්කර පොළොන්නරුවේ මහා පරිමාණ වීමෝල් හිමිකරුවන් ඒවා සහල් බවට පත්කර කිලෝවක් රුපියල් 240 ත් 260 ත් අතර මිලකට පාරිභෝගිකයන්ට ලබාදීම බරපතළ අසාධාරණයක් බවත් මෙම තත්ත්වය සැලකිල්ලට ගනිමින් රජය ඉතා කඩිමින් තමන්ගේ වී සහතිකයට ලබා ගැනීමේ වැඩපිළිවෙළ ආරම්භ කළ යුතු බවත් ගොවීහු යෝජනා කරති.
මෙවර මැද කන්නේ වගා කරන ලද තම වී වගාවෙන් කොටසක් පසුගිය කාලය පුරා ඇදහැලුණු අධික වර්ෂාවට හසුවීමත් සමඟම නෙළීමට නොහැකි මට්ටමේ පවතින බවත්, ඇතැම් වී අස්වනු සහ ගොයම් වර්ෂාවට හසුවීමෙන් විනාශ වී ඇති බවත් ගොවීන් ප්රකාශ කරති.
මහවැලි බි කලාපයේ ඉතිහාසයේ පළමුවරට දිඹුලාගල මහවැලි කොට්ඨාසයේ මැද කන්නයේ වගා කරන ලද නාඩු වී කිලෝ ලක්ෂ එකොළහක් රජයට ලබාදීමට සූදානම් වුවද රජය එම වී මිලදී ගැනීමේ වැඩපිළිවෙළක් මෙතෙක් ක්රියාත්මක කර නොමැති බව ගොවීහු පවසති.
මෙම තත්ත්වය මත පොළොන්නරුවේ මහා පරිමාණ සහල් මෝල් ව්යාපාරිකයන්ට ජාවාරම්කාරී ගනුදෙනුවකට ඉඩ සැලසීම බරපතල අසාධාරණයක් බව දිඹුලාගල කොට්ඨාසයේ ඉද්දෙපිච්ච වැව බෙදුම් ඇළ ගොවි සංවිධානයේ සභාපති උෂාන් වික්රමසූරිය පැවසීය.
රජයේ වී මිලදී ගැනීමේ වැඩපිළිවෙළට සම්බන්ධව පොළොන්නරුව දිස්ත්රික් ලේකම් කාර්යාලයෙන් අප දුරකථනයෙන් කළ විමසීමකදී එහි නිලධාරීයෙකු සඳහන් කළේ මෙවර රජය වී මිලදී ගැනීමේ වැඩපිළිවෙළ සමූපකාර හරහා ක්රියාත්මක කිරීමට සැලසුම් කර ඇති බවය.
ඒ අනුව ගබඩා ශුද්ධ පවිත්ර කරමින් මෙම මහ කන්නයේ වී මිලදී ගැනීමේ වැඩපිළිවෙළ ආරම්භ කිරීමට සියලු කටයුතු සූදානම් කර ඇති බවයි.
