දිනසේන රතුගමගේ –
මුලතිව් කොක්කුතුඩුවායී සමූහ මිනී වලේ කැණීම් කටයුතු නොවැම්බර් මස 20 දා සිට යළි ආරම්භ කරණ ලෙස මුලතිව් දිස්ත්රික් මහේස්ත්රාත් ධර්මලිංගම් ප්රදීපන් ඊයේ (31) පොලීසියට නියෝග කර ඇත.
එදිනට සියළු පාර්ශ්වයන් කැඳවා සාකච්ඡාවක් පවත්වා නිසි සැලසුමක් සකසා කැණීම් කටයුතු ආරම්භ කරණ ලෙසටද විනිසුරුවරයා නියෝග කළේය.
මුලතිව් දිසාපති කාර්යාලයේ ප්රධාන ගණකාධිකාරිවරයා අධිකරණයට පැමිණ සිටි අතර ඔහුට නියෝගයක් නිකුත් කරමින් විනිසුරුවරයා සඳහන් කළේ කැණීම් කටයුතු ආරම්භ කිරීමට පෙර ඒ සදහා යම් නිශ්චිත කාලයකට අදාලවන වියදම් වාර්තාවක් අධිකරණට ඉදිරිපත් කරන ලෙසය.
මේ අතර පුරාවිද්යා මහාචාර්ය රාජ් සෝමදේව කොක්කුතුඩුවායී සමූහ මිනී වලට ඔබ්බෙන් එම ප්රදේශයේ සිට මීටර් 50ක් පමණ දුරින් වෙනත් ස්ථානවල මිනිස් ඇට සැකිලි ඇද්දැයි සෙවීම සදහා ස්කෑන් යන්ත්ර හා වෙනත් රේඩාර් වැනි උපකරණ භාවිත කිරීමට සිදු වන බව මීට ඉහතදී පොලීසියට දැනුම් දී තිබීම නිසා විනිසුරුවරයා එම උපකරණ භාවිතය සදහා අවසර ලබා දෙන බවත් මෙම සියළුම විස්තර මහාචාර්යවරයා වෙත දන්වා යවන ලෙසත් පොලීසියට නියෝග කළේය.
රාජ් සෝමදේව මහාචාර්යවරයා මෙම සමූහ මිනී වලේ කැණීම් කටයුතු වෙනුවෙන් ලබා දෙන ලද සුවිශේෂී දායකත්වය සම්බන්ධයෙන් එතුමාට අධිකරණයේ විශේෂ ප්රණාමය හිමි වන බවද මුලතිව් මහේස්ත්රාත්වරයා අධිකරණයේදී ප්රකාශ කොට සිටියේය.
