දිනසේන රතුගමගේ
යුද්ධයෙන් මියගිය වැසියන් සමරණ මුවාවෙන් මියගිය එල්.ටී.ටී.ඊ නායකයින් හා එහි සාමාජිකයින් සැමරීමේ උළෙල උතුරේ බොහෝ ස්ථාන වල සංවිධානය කොට ඇති බවට ලැබී ඇති තොරතුරු නිසා අද (15) සිට 20 වෙනිදා දක්වා උතුරු පළාත තුළ ආරක්ෂක අංශ සීරුවෙන් තබා ඇතැයි ජෙයෂ්ඨ හමුදා නිලධාරියෙකු පැවසීය.
යුද හමුදාව මහජනතව ගැවසෙන ස්ථානවලට නොයන නමුත් අවශ්ය අවස්ථාවකදී ඒ සඳහා මුහුණ දීමට ඔවුන් සූදානම් කොට ඇතැයි කී එම නිලධාරියා පොලීසිය හා පොලිස් විශේෂ කාර්ය බලකාය උතුරේ ගම්මටමේ සිදු කෙරෙන උත්සව කෙරෙහි දැඩි අවධානයකින් යුතුව සිටින බවද කියා සිටියේය.
මේ දිනවල උතුරේ වැසියන්ට කැඳ බෙදා දීමක් සිදුවන අතරවාරයේ කැද සමග රාජ්ය විරෝධී පත්රිකා බෙදීමට එල්.ටී.ටී.ඊ සංවිධානයට හිතවත් පිරිසක් කටයුතු කරමින් සිටින බවට තොරතුරු ලැබී තිබේ.
මුලතිව් ප්රදේශයේ වැසියන් අතර එවැනි ප්රත්රිකා බෙදා දි ඇති බවටද තොරතුරු ලැබී ඇත.
උතුරේ බොහෝ ස්ථානවල යුද්ධයෙන් මියගිය වැසියන් සමරන මුවාවෙන් එල්.ටී.ටී.ඊ සංවිධානයෙන් මියගිය පිරිස සැමරීමට තරුණ සංවිධාන කීපයක් උත්සාහ කරණ අතර තුර එම උත්සවවලට සහභාගී වන පිරිසට කොටි සංවිධානය යළි පණ ගැන්විය යුතු බව කියමින් දේශන පැවැත්වීමටද එම තරුණ කණ්ඩායම් සූදානමින් සිටිති.
යුද්ධයෙන් මියගිය පිරිසට පින් අනුමෝදන් කරවීම පිණිස යාපනය විශ්වවිද්යාලය විසින් සංවිධානය කළ ලේ දන්දීමේ අවස්ථාවට සහභාගී වූ ජනතාවට පත්රිකා බෙදා දීමත් දේශන පැවැත්වීමත් සිදු කොට ඇත.
යුද්ධයෙන් මියගිය පිරිස සැමරෙන අවසන් දිනය මැයි මස 19 වෙනිදා මුලතිව් වෙල්ලමුල්ලිවයික්කාල් මුහුදු තීරයේ ස්ථාපිත කොට ඇති විශේෂ ස්මාරකය අබියසදී සිදු කිරීමට කටයුතු යොදා ඇත.
