මිද්දෙනියෙන් සොයා ගන්නා ලද ද්රව්ය තුළ අයිස් මත්ද්රව්ය අඩංගු බවට අන්තරායකර ඖෂධ පාලක ජාතික මණ්ඩලය ප්රකාශ කර තිබේ.
ඉන්දුනීසියාවේ සිට මෙරටට රැගෙ පැමිණි පානදුරේ නිලංග නැමැත්තාගේ සමීපතමයෙකුගෙන් ලබා ගන්නා ලද තොරතුරු අනුව කඳාන ගනේමුල්ල මාර්ගයේ නිවසකින් සොයා ගන්නා ලද ද්රව්යවල සාම්පල ද අද රස පරීක්ෂක දෙපාර්තමේන්තුව විසින් ලබාගෙන ඇත.
මිද්දෙණියෙන් සොයාගත් ද්රව්ය අද රස පරීක්ෂකවරයා මෙන්ම අන්තරායකර ඖෂධ පාලක ජාතික මණ්ඩලය ද පරීක්ෂාවට ලක් කරමින් ඇතැයි වාර්තා වේ. අන්තරායකර ඖෂධ පාලක ජාතික මණ්ඩලය අද ප්රකාශ කළේ මිද්දෙණියෙන් සොයා ගත් සාම්පල කීපයක අයිස් මත්ද්රව්යම තිබුණු බවය.
“ අපේ නිලධාරීන් ගිහින් සාම්පල 20ක් පමණ ගත්තා. ඒ අරගෙන පරික්ෂණ කරමින් පවතිනවා. මට ඒ ගැන දැන් එක දෙයක් කියන්න පුලුවන්. ඒ තිබුණු සමහර සාම්පලවල මෙතන්ෆිටමින්ම තියන අවස්ථා දක්නට ලැබෙනවා සමහර කොටස්වල. අපි මේක සම්පූර්ණ පරීක්ෂණයක් කරලා නෑ. සාම්පල කීපයක් තමයි පරීක්ෂණ කරලා ඉවර. තව දින කීපයකින් අවසන් පූර්ණ වාර්තාව අපි ලබා දෙනවා. අන්තරායකර ඖෂධ පාලන ජාතික මණ්ඩලයේ සභාපති විශේෂඥ වෛද්ය ඉන්දික වන්නිනායක පැවසුවේය.
නුවරඑළිය ප්රදේශයේ අයිස් මත්ද්රව්ය නිශ්පාදන කර්මාන්ත ශාලාවක් පවත්වාගෙන ගිය බව කෙහෙල්බද්දර පද්මේ විසින් හෙළිදරවු කිරීමත් සමග මෙම වර්ධනයන් ඇති වූයේය. පොලිසිය පැවසුවේ එම නිශ්පාදනාගාරය පරීක්ෂා කිරීමට කණ්ඩායම් පිටත් කර යවා ඇති බවය. කෙහෙල්බද්දර පද්මේ සමග අත් අඩංගුවට ගත් බැකෝ සමන් නැමැත්තා අයිස් නිශ්පාදනයට ගන්නා රසායනික ද්රව්ය තොගයක් ගැන ආනරවරණය කරන්නේ මේ අතරය.
මේ ද්රව්යයට සමාන යැයි සැලකෙන ද්රව්ය තොගයක් මිද්දෙනිය සුසාන භූමියකින්,, නෙටොල්පිටියෙන් සහ කඳානෙන් සොයා ගන්නේ ඉන් අනතුරුවය.
