රටේ ප්රජාතන්ත්රවාදය ව්යසනයට ලක්කර ජන මතය මැඩ මැතිවරණ කල් දැමීම සඳහා ජනාධිපති ප්රමුඛ ආණ්ඩුව ගන්නා අශීලාචාර උත්සාහයට එරෙහිව සංඝ ආඥාවක් නිකුත් කොට ඉක්මන් ක්රියාමාර්ගයක් ගන්නා ලෙස ජාතික භික්ෂු පෙරමුණ ලෙස එම පෙරමුණේ ලේකම් පූජ්ය වකමුල්ලේ උදිත, සභාපති පූජ්ය හදුගල රතනපාල හිමිවරු ප්රමුඛ භික්ෂු පෙරමුණේ නියෝජිත භික්ෂූන් වහන්සේ පිරිසක් අද (02) දින ත්රෛනිකායකි මහා නායක හිමිවරුන්ගෙන් ඉල්ලා සිටියහ.
උන්වහන්සේලා අද මහනුවරට වැඩම කර මල්වතු අස්ගිරි මහා නායක හිමිවරු මුණ ගැසී මේ ඉල්ලීම සහිත සංදේශය භාර දී තිබුණහ.
උක්ත සංදේශ භාර දීමෙන් අනතුරුව මාධ්ය වෙත අදහස් දක්වමින් පූජ්ය වකමුල්ලේ උදිත හිමියන් ප්රකාශ කළේ මේ පාලකයින් ගමන් කරන්නේ වියරු ඒකාධිපති ගමනක බවය.
පළාත් පාලන ඡන්දය පැවැත්වීමට තිබුණේ මීට වසරකට පෙර දි බව පෙන්වා දුන් උන්වහන්සේ ජනතා කැමැත්ත අහිමි පාලක පන්තිය රාජ්ය බලය යොදමින් ජනතා සතු ඡන්ද බලය උදුරා ගන්නවා සේම ඊට එරෙහිවන ජනතාව ඝාතනය කරමින් සිටින බව ද වැඩිදුරටත් කීහ.
මෙම තත්ත්වය අවසන් කිරීම සඳහා මහා නායක හිමිපාණන්වහන්සේලා මූලික වී ත්රෛනිකායික කාරක මහා සංඝ සභා රැස් කරවා දූෂිත පාලකයන් සම්බන්ධව නිශ්ඡිත තීන්දුවක් ගන්නා ලෙස මෙන්ම, පළාත් හා ප්රාදේශීය නායක හිමිපාණන් වහන්සේලා හා ශාසනික වගකීම් දරන සෙසු මහා සංඝරත්නය හා එක්ව සඟ සමුළුවක් කැඳවන ලෙසද ජාතික භික්ෂු පෙරමුණ ඉල්ලූ බව උන්වහන්සේ පැවසූහ.
එමෙන්ම එසේ සඟ සමුළුවක් රැස්කොට මහජන හිතෛෂි තීරණයක් ලෙස දැනට දින නියමයක් අහෝසි වී ඇති පළාත් පාලන මැතිවරණය හැකි ආසන්නතම දිනයක පවත්වන ලෙස අදාළ බලධාරීන් වෙත සංඝ ආඥාවක් නිකුත් කරන ලෙස ද මහා නායක හිමිවරුන්ගෙන් ලිඛිතව ඉල්ලූ බවත් උන්වහන්සේ පැවසූහ.
යම් හෙයකින් එය නොසලකා හරින පාලකයින් හා බලධාරීන් වෙත්නම් ඔවුන් සම්බන්ධ ගතයුතු ඉදිරි ක්රියාමාර්ග සම්බන්ධව ජනතාව වෙත කරුණු දක්වන ලෙස ද ජාතික භික්ෂු පෙරමුණ මහා නායක හිමිවරුන්ගෙන් ඉල්ලීමක් කර ඇත.
මෙම ඉල්ලීම සම්බන්ධව මහා නායක හිමිවරුන්ගේ යහපත් ප්රතිචාර තිබුණු බවද වකමුල්ලේ උදිත හිමියෝ කීහ.
