ලබන මාර්තු මස 9 වනදා පැවැත්වීමට සැළසුම් කර ඇති පළාත් පාලන ඡන්ද විමසීමේ කටයුතු අත්හිටුවිමේ රිට් ආඥාවක් මැතිවරණ කොමිසම වෙත නිකුත් කරන ලෙස ඉල්ලා ශ්රේෂ්ඨාධිකරනයට ඉදිරිපත් වී ඇති පෙත්සමත්, මැතිවරණය වහාම පවත්වන ලෙස නියෝගයක් නිකුත් කරන්නැයි ඉල්ලා ඉදිරිපත්වී ඇති පෙත්සමත් අද (10) යළි විභාගයට ගැනීමට නියමිතය.
ඡන්ද විමසීමේ කටයුතු අත්හිටුවීමේ රිට් ආඥාවක් මැතිවරණ කොමිසම වෙත නිකුත් කරන ලෙස ඉල්ලා පෙත්සමක් ඉදිරිපත් කර ඇත්තේ පසුගියදා විශ්රාමික යුද හමුදා කර්නල්වරයෙකු වන ඩබ්ලිව්.එම්.ආර්. විජේසුන්දරය.
රටේ බරපතල ආර්ථික අර්බුදයක් පවතින අවස්ථාවක සහ ජාත්යන්තර මූල්ය අරමුදල බරපතල කොන්දේසි පනවා ඇති අවස්ථාවක මැතිවරණයක් පැවැත්වීම නුසුදුසුයැයි සමාජ මතයක් නිර්මාණය වී ඇති බවත්, පළාත් පාලන මැතිවරණය පැවැත්වීම තුලින් රටට හෝ මහජනතාවට කිසිදු යහපතක් අත් නොවන බවත් ඔහු සිය පෙත්සමින් පෙන්වා දී ඇත.
ඒ අනුව මැතිවරණ කටයුතු සිදුකිරීම වැළැක්වීමේ රීට් ආඥාවක් මැතිවරණ කොමිසමට නිකුත් කරන ලෙස ඔහු ඉල්ලා තිබේ.
මේ අතර පළාත්පාලන මැතිවරණය කඩිනමින් පැවැත්වීමට පියවර ගන්නා ලෙසට මැතිවරණ කොමිසන් සභාවට නියෝග කරන ලෙස ඉල්ලා සමගි ජනබලවේගයේ මහලේකම් රංජිත් මද්දුමබණ්ඩාර සහ මහාචාර්ය ජී.එල් පීරිස් විසින් එක් පෙත්සමක් ගොනු කර ඇති අතර ශ්රී ලංකා නිදහස් පක්ෂයේ මහලේකම් දයාසිරි ජයසේකර, ලක්ෂ්මන් කිරිඇල්ල, අනුර ප්රියදර්ශන යාපා සහ එම්.ඒ සුමන්දිරන් යන මන්ත්රීවරුන් තවත් පෙත්සමක් අධිකරණය ඉදිරියේ ගොනු කර තිබේ.
මැතිවරණ කොමිෂන් සභාවේ සභාපති නිමල් පුංචිහේවා ඇතුළු එහි සාමාජිකයන් සහ අග්රාමාත්ය දිනේෂ් ගුණවර්ධන මෙම පෙත්සමේ වගඋත්තරකරුවන් ලෙස නම් කර ඇත.
