කතරගම මැණික් ගඟ අසල වාරි මාර්ග රක්ෂිතයක ඉදිකර ඇති දැවැන්ත සුඛෝපභෝගී නිවස තමන්ට හිමි දේපලක් නොවන බව ප්රකාශ කරමින් හිටපු ජනාධිපති ගෝඨාභය රාජපක්ෂ සිය මුහුණු පොතේ විශේෂ ප්රකාශයක් පල කර තිබේ.
ඔහු පෙන්වා දෙන්නේ මේ නිවසේ හිමිකම පිළිබඳව තමන්ව ප්රශ්න කරමින් ඇත්තේ අදාල නිවසේ විදුලි බිල් පතක් ජී. රාජපක්ෂ නැමැත්තෙකුගේ නමට තිබීම පමණක් බව ඔහු එම ප්රකාශයේ සඳහන් කර ඇත.
ගෝඨාභය රාජපක්ෂ විසින් පළ කර ඇති එම ප්රකාශය මෙසේය.
කතරගම මැණික් ගඟ අසබඩ අන් අයෙකු විසින් ඉදි කර ඇති ගොඩනැගිල්ලක් මා හට අයත් යැයි වරදවා සඳහන් කරනු ලබන පුවතක් කලින් කල ජනමාධ්යයේ පළ වෙනු නිරීක්ෂණය වී තිබේ. 2025 ඔක්තෝබර් 13 වැනි සඳුදා ද (ඊයේ) ඇතැම් රූපවාහිනී නාලිකා ඔස්සේ පළ වූ පුවතකින් එකී ගොඩනැගිල්ල පිළිබඳව සඳහන් කිරීමේදී මාගේ නම ද නැවතත් සඳහන් කර තිබේ.
එකී ගොඩනැගිල්ලේ අයිතිය පිළිබඳව පසුගිය වකවානුවේ සී.අයි.ඩී පරීක්ෂණයක් පැවැත්වුණි. එම පරීක්ෂණයට අදාළ ව මම ද ප්රකාශයක් ලබා දුන්නෙමි. ඒ පිළිබඳව මාගෙන් විමසීමට හේතුව වී ඇත්තේ එම ගොඩනැගිල්ලට විදුලි සම්බන්ධතාවය ලබා ගැනීම සඳහා “ජී.රාජපක්ෂ” යන අයෙකුගේ නමින් ඉදිරිපත් කර තිබූ අයදුම්පතක් පමණී. එම අයදුම්පතේ හරි ආකාර අත්සනක් ද යොදා නොතිබුණි. අත්සන තිබිය යුතු තැන වූයේ අපැහැදිලි කුරුටු ගෑමකි.
මෙම වැරදි පුවත විටින් විට මතු වෙන හෙයින් ද සැමගේ දැන ගැනීම පිණිස ද, කතරගම මැණික් ගඟ අසබඩ එකී ගොඩනැගිල්ල මා හට අයත් දේපළක් නොවන බව තරයේ ප්රකාශ කරමි. කතරගම ප්රදේශයේ කිසිදු ගොඩනැගිල්ලක් ඉදි කිරීමට හෝ පවත්වා ගෙන යෑමට හෝ මා හට කිසිදාක කිසිදු හේතුවක් හෝ උවමනාවක් හෝ තිබී නැති බව ද කිව යුතුය.
