දිනසේන රතුගමගේ –
-
ෆුල් පේස් හෙල්ටම් දාගෙන මුහුණ කළු රෙද්දකින් වහගත්තු කෙනෙක් බයිසිකලෙන් බැහැලා එක දිගට වෙඩි තිබ්බා… මන්නාරම ඝාතනයේ ඇසින් දුටු සාක්ෂියක්…
මන්නාරම අධිකරණය ඉදිරිපිට අද (16) දා උදෑසන සිදු වූ වෙඩි තැබීමකින් පුද්ගලයින් දෙදෙනෙකු මියගොස් තවත් දෙදෙනෙකු තුවාල ලබා මන්නාරම රෝහලට ඇතුළත් කිරීමේ සිද්ධියෙන් අනතුරුව මේ වනවිට දැවැන්ත මෙහෙයුමක් මන්නාරම නගරය තුළ අරඹා තිබේ.
මියගිය දෙදෙනා සබ්රියන් අරුල් ( 63 ) සහ සෙල්වකුමාර් ජූඩ් ( 42 ) නැමති දෙදෙනා බවට හඳුනාගෙන ඇත.
රෝහල් ගත කොට සිටින තුවාලකරුවන් දෙදෙනා අතර කාන්තාවක්ද සිටියි.
තුවාල ලබා සිටි හතර දෙනාගෙන් දෙදෙනෙකු රෝහලට ඇතුළත් කරණ විටත් මියගොස් සිටි බව මන්නාරම රෝහලේ වෛද්ය නිලධාරී හනීෆා පැවසීය.
මන්නාරම අධිකරණයේ වෙනත් නඩු කටයුත්තක් සඳහා පැමිණ සිටි කාන්තාවක් සිද්ධිය දැක ඇති අතර ඇය ප්රකාශ කොට සිටියේ යතුරු පැදියකින් පැමිණි දෙදෙනෙකුගෙන් එක් අයෙකු බිමට බැස එක දිගටම වෙඩි තබා ගෙන ගිය බවය.
මුහුණු ආවරණය වන සේ හෙල්මට් පැළඳ සිටි ඔහුගේ මුහුණේ කලු රෙදිකඩක් වැනි යමක් තිබෙනු තමන් දුටු බවද ඇය ප්රකාශ කොට තිබේ.
වෙඩි වරුසාවක් එල්ල කිරීමෙන් පසුව ඔහු යතුරු පැදියට ගොඩ වූ බවත් අනෙක් පුද්ගලයා වේගයෙන් යතුරු පැදිය පදවා ගෙන ගිය බවත් ඇය කීවාය.
මේ අවස්ථාවේදී අධිකරණය ඉදිරිපිට සිටි පිරිස හිස් ලූ ලූ අත දිව ගිය බවද විනාඩි කීපයකට පසුව පොලීසිය පැමිණ තුවාල කරුවන් රෝහලට රැගෙන ගිය බවද ඇය වැඩිදුරටත් ප්රකාශ කළාය.
2022 ජුනි 10 වැනි දින මන්නාරම උයිලන්කුලම ප්රදේශයේ ගොන් කරත්ත තරගයක් අතරතුර ඇති වූ බහින් බස්වීමක් දුරදිග යාමෙන් සහෝදරයන් දෙදෙනකු වෙනත් පාර්ශ්වයන් විසින් ඝාතනය කරන ලදී.
ඊට සම්බන්ධ නඩු විභාගය මන්නාරම අධිකරණයේ විභාග වීමට නියමිත දිනයේදී ඊට සහභාගී වීමට පැමිණි පිරිසක් ඉලක්ක කරගෙන මෙම වෙඩි ප්රහාරය සිදු වූ බව මන්නාරම පොලීසිය පැවසීය.
යතුපැදිවලින් පැමිණි කණ්ඩායමක් ඔවුන්ට වෙඩි තබා පලා ගොස් තිබේ.
සිද්ධියට සම්බන්ධ සැකකරුවන් මෙතෙක් අත් අඩංගුවට ගෙන නොමැති අතර සිද්ධියෙන් පසුව පොලීසිය පොලිස් විශේෂ කාර්ය බලකය හා යුද හමුදාව මන්නාරම නගරය හා ඒ අවට මාර්ග බාධකද යොදා සෝදීසි මෙහෙයුමක් දියත් කොට තිබේ.
මන්නාරම පොලීසිය සිද්ධිය සම්බන්ධයෙන් පරීක්ෂණ පවත්වා ගෙන යයි.
