අසේල කුරුළුවංශ –
මධ්යම පළාතේ පාසල්වල 10 වැනි ශ්රේණියට අදාළව තෙවන වාර විභාගය සඳහා පළාත් අධ්යාපන දෙපාර්තමේන්තුව මගින් පාසල්වලට ලබාදී තිබූ විද්යාව, ගණිතය හා ඉංග්රීසි ප්රශ්න විභාග දිනට පෙර පිටවී තිබෙන බව මධ්යම පළාත් හිටපු සෞඛ්ය හා ක්රීඩා අමාත්ය, සමගි ජනබලවේගයේ පාතදුම්බර ආසන සංවිධායක තිළිණ බණ්ඩාර තෙන්නකෝන් පවසයි.
අදාළ විෂයන් සඳහාවන විභාගය මෙම දිනවල පාසල් වල පැවැත්වෙන බවත් විභාගයට දින කිහිපයකට පෙර ප්රශ්න පත්ර පිටවූයේ කෙසේද යන්න ප්රශ්නයක් බවත් ඔහු කීය.
මහනුවරදී අද (29) මාධ්ය හමුවක් කැඳවමින් තිළිණ බණ්ඩාර තෙන්නකෝන් මේ බව පැවසුවේය.
දිට්වා සුළි කුණාටුවේ බලපෑම සැලකිල්ලට ගෙන තෙවන වාර විභාගය නොපවත්වා අදාළ ප්රශ්න පත්ර සිසුන්ට ලබාදී 10 හා 11 ශ්රේණි සඳහා විභාග පවත්වන ලෙස අධ්යාපන අමාත්යාංශය දැනුම් දී තිබියදී එම ප්රශ්න පත්ර කලින් පිටවීම ගැටලු සහගත බවද ඔහු කීවේය.
මෙම ප්රශ්න මහනුවර පදිකවේදිකාවේදී හමුවූ පුද්ගලයෙකු තමන් අතට පත්කළ බවත් මෙය අනාවරණය කිරීමෙන් පසු මේවා ලැබුණේ කෙසේද යන්න සොයා බැලීම සඳහා තමන් අපරාධ පරීක්ෂණ දෙපාර්තමේන්තුවට රැගෙන නොගොස් ප්රශ්න පත්ර පිටවූයේ කෙසේද යන්න සම්බන්ධයෙන් විමර්ශනයක් කිරීම ආණ්ඩුවේ වගකීම බවත් හෙතෙම අවධාරණය කළේය.
අයහපත් කාලගුණික තත්ත්වයේ බලපෑම හේතුවෙන් පාසල් සිසුන් පත්වූ පීඩාව සැලකිල්ලලට ගෙන විභාග නොපවත්වා 06 ශ්රේණියේ සිට 09 වැනි ශ්රේණිය දක්වාවූ සිසුන්ට එම ප්රශ්න පත්ර බෙදා දී සාකච්ඡා කරන ලෙසත් 10 හා 11 ශ්රේණි සඳහා පමණක් විභාග පවත්වන ලෙසත් විදුහල්පතිවරුන්ට කලාප අධ්යාපන අධ්යක්ෂවරු මගින් දැනුම් දී තිබියදී එක් විදුහල්පතිවරයෙකු සියලුම පංති වලට අදාළ ප්රශ්න පත්ර සිසුන්ට අතට පත් කිරීමෙන් මෙම ගැටලුව නිර්මාණය වී තිබෙන බව මධ්යම පළාත් අධ්යාපන අධ්යක්ෂ නිහාල් අලහකෝන් පවසයි.
ඒ සම්බන්ධයෙන් අදාළ විදුහල්පතිවරයාට එරෙහිව විමර්ශනයක් ආරම්භ කර තිබෙන බවද ඔහු කීවේයෙ
