2026 විස්සයි-20 ලෝක කුසලාන තරගාවලියේ මීළඟ වටයට සුදුසුකම් ලබා සිටින ශ්රී ලංකා කණ්ඩායමට ප්රබල අභියෝගයක් එල්ල කරමින්, වේග පන්දු යවන ක්රීඩක මතීෂ පතිරණ ආබාධයක් හේතුවෙන් තරගාවලියේ ඉතිරි තරගවලින් ඉවත් වී තිබේ.
පෙරේදා (16) ඕස්ට්රේලියාවට එරෙහිව පැවති තීරණාත්මක තරගයේදී සිය පළමු පන්දු වාරයේ සිව්වන පන්දුව යොමු කිරීමෙන් අනතුරුව මතීෂ පතිරණ මෙම ආබාධයට මුහුණ දුන්නේය.
ආබාධයේ ස්වභාවය වන්නේ වම් පාදයේ වළලුකර ආසන්න මාංශ පේශිවල (left calf) ඇති වූ ආබාධයක් ලෙස මෙය මුලින් හඳුනාගෙන තබිණි. එය ‘හැම්ස්ට්රින්’ (Hamstring) ආබාධයක් විය හැකි බවටද සැක කෙරේ.
‘හැම්ස්ට්රින්’ (Hamstring) ආබාධයක් යනු කලවා ප්රදේශයේ පිටුපස පිහිටා ඇති ප්රධාන මාංශ පේශි තුනක එකතුව අධික ලෙස ඇදීයාම හෝ ඉරීයාම නිසා සිදුවන තත්ත්වයකි. මෙය සාමාන්යයෙන් සිදුවන්නේ ධාවනයේදී හෝ පන්දු යැවීමේදී මෙන් ඉතා වේගයෙන් දිවීම හෝ හදිසියේ දිශාව වෙනස් කිරීම වැනි දැඩි ශාරීරික ක්රියාකාරකම්වල යෙදෙන විට එම මාංශ පේශිවලට දරාගත නොහැකි පීඩනයක් එල්ල වීමෙනි. මෙවැනි ආබාධයක් ඇති වූ විට දැඩි වේදනාවක්, ඉදිමීමක් සහ පාදය චලනය කිරීමේ අපහසුතාවක් ඇති වන අතර, ක්රීඩකයෙකුට නැවත පිටියට පිවිසීමට සති කිහිපයක සිට මාස කිහිපයක් දක්වා කාලයක් විවේක ගැනීමට සහ භෞතචිකිත්සක ප්රතිකාර ලබා ගැනීමට සිදු වේ.
ඊයේ (පෙබරවාරි 17) සිදු කරන ලද ස්කෑන් පරීක්ෂණවලින් අනතුරුව, ඔහුට තවදුරටත් තරගාවලියට සහභාගී විය නොහැකි බව වෛද්යවරුන් තහවුරු කර ඇත.
මතීෂ පතිරණ වෙනුවට වමත් වේග පන්දු යවන ක්රීඩක ඩිල්ෂාන් මධුශංක සංචිතයට කැඳවීමට වැඩි ඉඩක් පවතින බව වාර්තා වේ. කෙසේ වෙතත්, මේ සඳහා ජාත්යන්තර ක්රිකට් කවුන්සිලයේ (ICC) තාක්ෂණික කමිටුවේ නිල අනුමැතිය මෙතෙක් හිමිවී නොමැත.
කණ්ඩායමට එල්ල වූ බලපෑම
මෙම තරගාවලිය තුළ ශ්රී ලංකා ප්රබල ක්රීඩකයින් ආබාධවලට ලක්වූ තෙවන අවස්ථාව මෙයයි: වනිඳු හසරංග හැම්ස්ට්රින් ආබාධයක් හේතුවෙන් සංචිතයෙන් ඉවත් විය. ආදේශක ක්රීඩකයා ලෙස දුෂාන් හේමන්ත නම් කෙරිනි.
එෂාන් මාලිංග උරහිසේ ආබාධයක් හේතුවෙන් තරගාවලිය ආරම්භයට පෙරදීම සංචිතයෙන් ඉවත් විය. ආදේශක ක්රීඩකයා වූයේ ප්රමෝද් මධුෂාන්ය. දැන් අලුත්ම ගැටලුව මතීෂ පතිරණය.
කෙසේ වෙතත් මේ වනවිට ශ්රී ලංකා කණ්ඩායම සුපිරි 08 දෙනාගේ වටයට පැමිණ තිබේ. කණ්ඩායමේ විශිෂ්ට ක්රීඩකයින් තිදෙනෙක් ආබාධ මැද තරග නොකරන පසුබිමක ලබා ගත් මේ ජයග්රහණය විශිෂ්ඨ එකකි. පැතුම් නිස්සංක වාර්තා කළ අලංකාර ශතකය මෙම ජයග්රහණයේ ප්රධානතම සාධකය විය.
