මනම්පිටිය නිමල් ජයරත්න –
දිඹුලාගල දළුකාන ආදිවාසී නායිකාව වන කේ. ලිසිනෝනාගේ පොල් අතු වෙළෙඳසලට මත්ද්රව්ය ජාවාරමට සම්බන්ධ පිරිසක් විසින් ගිනි තබා විනාශ කර ඇතැයි ඇය මනම්පිටිය පොලිසියට අද (14) පැමිණිල්ලක් ඉදිරිපත් කර තිබේ.
දලුකාන ගම්මානයේ සහ අවට ආදිවාසි ගම්මානවල නිරන්තරවම සිදුවන නීති විරෝධී මත්පැන්, මත්කුඩු, ගංජා, ජාවාරමට දිගින් දිගටම විරෝධය, දක්වා උපවාස සිදුකිරිම නිසා අද අළුයම් කාලයේ මත්ද්රව්ය ජාවාරම්කරුවකු හෝ පිරිසක් තම කුඩා පොල් අතු වෙළඳසැල ගිනි තබා විනාශ කර ඇතැයි මේ පිළිබඳව අප කළ විමසුමක දී දළුකාන ආදිවාසී නායිකා කේ.ලිසිනෝනා හඬා වැළපෙමින් සඳහන් කළාය.
තමා මේ පිළිබඳ අද (14) උදෑසන මනම්පිටිය පොලිසියට පැමිණිල්ලක් ඉදිරිපත් කළ බවත්, මේ පිළිබඳ වහා පරීක්ෂණයක් සිදුකර සැකකරුවන් අත්අඩංගුවට ගෙන නීතිය ක්රියාත්මක නොකළහොත් හොත් තමා දඹාන ආදිවාසී නායකයින් සමග එක්ව දැඩි ක්රියාමාර්ග ගන්නා බවත් කේ ලිසීනෝනා පැවසුවාය.
58 වියති තිදරු මවක වන ලිසීනෝනා මීට පෙර අවස්ථා හතකදී පමණ දළුකාන ඇතුළු ආදිවාසි ගම්මානවල තම වරිගයින් මත්පැන්වලට ගොදුරුව ජීවිත විනාශ වීම පිළිබඳව විරෝධතා පවත්වා හඬාක් නැගූ කාන්තාවක් වන අතර මත්ද්රව්ය ජාවාරමට දැඩිලෙස විරුද්ධව ක්රියාකළ ආදිවාසි නායිකාවකි.
දිගින් දිගටම මත්ද්රව්ය ජාවාරමට විරුද්ධව ක්රියාකළ නිසා දලුකාන ගම්මානයේ කිසියම් පුද්ගලයෙකු හෝ පිරිසක් පැමිණ තමන් ජීවත්වීමට අඹ සහ පොල් විකුණු කුඩාපොල් අතුපැළ විනාශ කිරීම නිසා තමන් දැඩි අසීරුතාවට පත්ව ඇති බවද ආදිවාසි නායිකාව හඬා වැලපෙමින් ප්රකාශ කළාය.
මේ පිළිබඳව දලුකාන ආදිවාසි නායිකාව පැමිණිල්ලක් සිදුකර ඇති බවත්, සැකකරුවන් අත්අඩංගුවට ගැනීම් සඳහා විශේෂ විමර්ශනයක් ආරම්භ කර ඔවුන්ට විරුද්ධව නීතිය ක්රියාත්මක කරන බවත් මනම්පිටිය පොලිස් ස්ථානාධිපති පොලිස් පරීක්ෂක අසේල සරත් කුමාර අප කළ විමසීමේදී පැවසීය,
