මනම්පිටිය නිමල් ජයරත්න –
මත්ද්රව්ය ජාවාරම්කරුවන් පිළිබඳ වැලිකන්ද පොලිසියට තොරතුරු ලබාදුන් අයගේ විස්තර එම ජාවාරම්වල යෙදෙන අපරාධකරුවන් වෙත හෙළි කිරීමට ඇතැම් පොලිස් නිලධාරීන් කටයුතු කරන බවට වූ තොරතුරු තමන් වෙත ලැබී ඇතැයි නිවාස සංවර්ධන සහ ඉදිකිරීම් නියෝජ්ය අමාත්ය ටී.බි. සරත් සඳහන් කළේය.
මේ වනවිට මත්ද්රව්ය ජාවාරම්කරුවන් ගැන තොරතුරු වැලිකන්ද පොලිසිය වෙත ලබා දුන් පුද්ගලයින් එම ජාවාරම්කරුවන්ගේ මරණ තර්ජනවලට ලක් වී ඇති බව ද නියෝජ්ය ඇමතිවරයා පැවසුවේය.
නියෝජ්ය ඇමතිවරයා පෙන්වා දුන්නේ පොලිසියේ මේ හැසිරීම වෙනස් නොවන්නේ නම් ඒ සම්බන්ධව ගත හැකි උපරිම ක්රියාමාර්ග රජයක් ලෙස ලබා ගන්නා බවය.
“මේ තත්ත්වයන් මර්ධනය කිරීමේ අභියෝගය වත්මන් රජයට තියනවා. එය අප කරනවා. ප්රජාතන්ත්රවාදයට එරෙහි කිසිම දෙයක් වෙන්න තියන්නේ නෑ. නැවත මේ රටේ චන්ඩින්ට නම් ඉඩ නෑ… “ නියෝජ්ය ඇමතිවරයා පැවසුවේය.
පොහොසත් රටක් ලස්සන ජීවිතයක් යන වැඩසටහනට සමගාමීව පුනරුදයේ පුරවර පළාත් පාලන සතියට සමගාමීව වැලිකන්ද සංස්කෘතික මධ්යස්ථානයේදි වැලිකන්ද ප්රාදේශීය සභාව මගින් සංවිධානය කර තිබූ ව්යාපාරික හමුවට ඊයේ (21) සවස එක් වෙමින් නියෝජ්ය අමාත්යවරයා මේ බව අවධාරණයය කළේය. .
” ලංකාවෙම අඩු වයස් සීමාවකදී විවාහයට පත්වෙච්ච ඉහළම ස්ථානයක් ලබාගත්තු කොට්ඨාසයක් තමයි වැලිකන්ද ප්රාදේශීය ලේකම් කොට්ඨාසය. ඒ මත අවුරුදු විස්සෙදි පමණ වැඩි පිරිසක් විවාහ ජීවිතය විනාශ වෙනවා. ඒක වැලිකන්දට සමාජමය ප්රශ්නයක් වෙලා තියෙනවා.””
“වැලිකන්දේ විශාල වශයෙන් මත්ද්රව්ය මත් පෙති තියෙනවා, ඒ ගැන ජනතාව පොලිසියට කිව්වට පස්සේ තොරතුරු ලබාදෙන අය ගැන පොලිසිය විසින්ම අපරාධකරුවන්ට කියනවා. මේක බරපතල ප්රශ්නයක්. “
“ලංකාවේ ඕනම කෙනෙක් දැනගන්න ඕන නීතිය සාධාරණයි කියලා. ධනපති පන්තියේ මුදුන් මල්කඩ වන රනිල් වික්රමසිංහ මහතාටත් අපි නීතිය ක්රියාත්මක කළා. අපි රනිල් වික්රමසිංහ දැම්ම ඇතුළට දැන් නඩු. නඩුවෙන් වැරදිකාරයා වුනොත් පක්ෂ දහයක්, පහළොවක්, විස්සක් වුණත් වැඩක් නෑ. වැරදිකරු උනොත් දඩුවම්. එනිසා අපටත් සියලු දෙනාටත් නීතිය සාධාරණ විය යුතුයි. “
මහා ලෙකුයි කී අපරාධකාරයෝ දැන් කොහෙද ඉන්නේ. කෙහෙල්බද්දර පද්මෙලා, බැකෝ සමන්තලා දැන් සේරම වමාරනවා. තව අපරාධකාරයො තිස් ගානක් ඉන්නවා. අපි රතු වරෙන්තු දැම්මා. ඒ ඔක්කොම ගේනවා. අපි මේ ජනවරම ඉල්ලුවේ යුක්තියේ සාධාරණය ඉටුකරන්න. පාතාලය, මත්ද්රව්ය, කුඩු ඉවර කරන්න. එනිසා අපි පොලිසියට කියනවා දැන් පොලිසිය රාජකාරිය හරියට කරන්න. අපි ඒවට ඇඟිලි ගහන්න නෑ. එනිසා වැලිකන්දේ ඉන්න අපරාධකරුවන් ඇතුළට දාන්න. මත්පෙති, මත්ද්රව්ය නැති කරන්න. අපි ඒවට කිසිදු ආකාරයෙන් බාධාවක් කරන්නේ නෑ. ඒ අපරාධ ඉවරකරන්න අපිට කාලය දෙන්න.
මෙම අවස්ථාවට වැලිකන්ද ප්රාදේශිය සභාවේ සභාපති ඩී.ඩබ්ලිව්. වසන්ත, පක්ෂ, විපක්ෂ දේශපාලන නායකයින් සේම ව්යාපාරික ප්රජාව, රාජ්ය නිලධාරින් මෙන්ම විශාල පිරිසක් එක්ව සිටියහ.
