මනම්පිටිය නිමල් ජයරත්න –
බඩ ඉරිගු වගා කිරීමට යැයි පවසා සංවිධානාත්මක පිරිසක් විසින් පොළොන්නරුව වැලිකන්ද, මහවැලිතැන්න සහ මහසෙන්පුර ප්රදේශයේ පුරාවිද්යා දෙපාර්තමේන්තුවට මෙන්ම වනජීවී රක්ෂිතයට අයත් අක්කර දෙසීයක පමණ භූමියක ඇති කුඹුක්, පලු ,වීර ඇතුළු වටිනා ශාක යන්ත්ර සූත්ර යොදා කපා දැවැන්ත පරිසර හානියක් සිදුකර ඇති බව වාර්තා වේ.
ශ්රී ලංකා මහවැලි අධිකාරියට සහ පුරාවිද්යා දෙපාර්තමේන්තුවට අයත් පන්සල්ගල රක්ෂිතය, මෙන්ම බෝධිකුඩාආරු රක්ෂිතයේ තිබෙන දැවැන්ත කුඹුක්, පලු, වීර මිල්ල, වෙලං ගස්, ඇතුළු වටිනා ශාක බිම හෙලමින් මෙම විනාශය සිදුකර ඇති අතර, ඇතැම් ප්රදේශවලින් රක්ෂිත ගිනිතබා වනසා ඇති බව මේ සම්බන්ධ අදහස් දක්වන පරිසරවේදීහු කියති.
බඩ ඉරුගු වගා කිරීමට බව පවසමින් ජාවාරම්කරුවන් සහ ප්රදේශවාසීන් විසින් පසුගිය සතිය තුළ පමණක් අක්කර පනහක පමණ බිම් ප්රමාණයක් වනසා ඇති ලංකාසර කළ විමසීමක දී පරිසර වේදීහු කීහ.
වන අලින් මෙන්ම වන සතුන් විශාල වශයෙන් සැරිසරන මෙම පුරාවිද්යා රක්ෂිත මෙන්ම වනජීවී රක්ෂිතය වැනසීම නිසා එම භූමියේ සිටින සතුන් මේ දිනවල වැලිකන්ද, ඇතුළු අවට ගම්මාන වලට කඩාවැදී ගම්වාසීන්ගේ ජීවිත හා දේපොළ විනාශ කිරීමට පටන්ගෙන ඇති බවද ප්රදේශවාසීන් කියති.
මෙම බඩ ඉරිගු ව්යාපෘතිය පෞද්ගලික ආයතනය සම්බන්ධ කරමින් සිදුකරන අතර ඒ සඳහා ගොවීන් සම්බන්ධ කිරීමෙන් අදාල රජයේ නිලධාරින්ට වාසි ලැබෙන බැවින් මෙම විනාශය නතර කිරීමට මැලිකමක් දක්වන බවද ගොවි සංවිධාන නියෝජිතයින් සහ පරිසරවේදීන් අප සමග පැවසූහ.
මහසෙන්පුර සිදුවන මෙම පරිසර විනාශය සම්බන්ධ අප අසේලපුර මහවැලි කොට්ඨාස කළමණාකාර, ශෂි වදනීගෙන් විමසූ විට ඇය සඳහන් කළේ වසර කිහිපයක සිට මේ ප්රදේශයේ ගොවීන් ඉරිඟු වගාවට රක්ෂිත අල්ලාගෙන සිටින බවත්, ශ්රි ලංකා මහවැලි අධිකාරියට අයත් ප්රදේශයේ සිදුවන එම විනාශය නතර කිරීමට අවශ්යය මැදිහත්වීම සිදුකර ඇති බවත්ය.
අප මේ පිළිබඳව මහවැලි බි කලාපයේ නේවාසික ව්යාපාර කළමනාකාර සුගත් විරසිංහගෙන් දුරකථනය කළ විමසීමකදී පැවසුවේ අනවසර වගාකරුවන් පිරිසක් එම භූමිය අත්පත් කරගනිමින් සිටින බවත්, ඒ පිළිබඳ තමන් දැනගත් වහාම පොලිසිය යොදවා නතර කිරීමට පියවර ගත් බවත්ය.
