ඉඳුනිල් කහටපිටිය –
කියන දෙයක් අහන්නට දළදා භාරකාරිත්වය සූදානම් නැත. VIP කුපාඩිකම එළිපිටම සිදුවෙමින් තිබේ. පොලිස් මාධ්ය ප්රකාශකවරයා ඊයේ පැවසුවේ අද දළදා වන්දනාවට අලුතින් එක් නොවන ලෙසය. ඒ මිනිස්සු ලක්ෂ ගණනක් පෝලිම්වල රැඳෙමින් සිරි දළදා වන්දනාවට දින ගණන් ලැගුම් ගෙන සිටින බැවිනි. ඇතැම් පුද්ගලයින් මේ මහ මග ගත කරනු ලබන්නේ සිවුවන දිනයය.
එසේ මේ අසරණ මිනිස්සු පෝලිම්වල රැඳී දළදා භාරකාරිත්වය පොලිසිය, පුරාවිද්යා අංශ ඇතුළු මහනුවර ඉහළ නිලධාරීහු බුරුතු පිටින් හොර පාරෙන් දළදා වැන්දවීම එළිපිටම ආරම්භ කර තිබේ. වාර්තාවන ආකාරයට මේ වනවිට නිර්මාණය වී ඇත්තේ මල්වතු අස්ගිරි මහා නායක හිමිවරුන්ගේ පවා උපදෙස් නොතකමින් දියව්ඩන නිලමේවරයා සිය අභිමතය ක්රියාත්මක කරන ආකාරය බව අතිශය විශ්වාසවන්ත අභ්යන්තර ආරංචි මාර්ග පවසයි.
මේ වනවිට සුඛෝපභෝගී වාහනවල පුද්ගලයින් පුරවාගෙන ජනාධිපති මන්දිරය පැත්තෙන් විෂ්ණු දේවාල ඇත්ගාල හරහා මේ පිරිස් දළදා මාළිගාව වෙත යොමු කර ඇති අයුරු දකිමින් හිඳිමු. මේ කුපාඩි වැඩේ සිද්ධවන්නේ රටේ විධායක ජනාධිපතිවරයා මෙවැනි අශ්ලීල වැඩක් නොකරන ලෙස පැහැදිලිවම දන්වා සිටිය දී එම උපදෙස් තුට්ටුවකට මායිම් නොකරමිනි.
ඊයේ දිනයේ මහනුවර පොලිසියේ ඉහළම පුටුවල වැජඹෙන නිලධාරීන් තම තමන්ගේ හිතෛශීන් පොලිසියට ගෙන්වා ගනිමින් කෑම බීම සනීප ආරක්ෂක පහසුකම් ලබා දී පොලිස් නිල රථවලම නග්ගවාගෙන දළදා වන්දවා ඇති අයුරු මේ වනවිට හෙළිදරවු වී ඇත. පොලිසිය රටේ ආරක්ෂක ඇමතිවරයා සහ ත්රිවිධ හමුදා ප්රධානියාවන ජනාධිපතිවරයාගේ උපදෙස බලු පයිසකයකට සැලකුවේ නැත. මේ අතර මුදලට දළදා වන්දවන ජවාරමක් ද හෙළි වී තිබේ.
තමන්ට ලැබෙන වරප්රසාද යොදාගෙන එම වරප්රසාද මුදලට විකුණන අධමයෝ ද වෙති. පානදුර ප්රදේශයේ සිට පැමිණි පුද්ගලයින් තිදෙනෙක් අපට කීවේ රුපියල් විසි දහස බැගින් ගෙවා පෝලිමේ නොසිට දළදා වැන්ද බවය. මේ ඔබ දකින්නේ සැදැහැ සිත් විකල් කරවනක කුපාඩිකමට එරෙහිව දැන් ජනතාව අතරින් මතුවෙමින් ඇති විරෝධය ය.
