සූරියවැව නුවන් ජයසේකර –
මහ මුහුද මැදදී බෝට්ටුව පෙරළී පැය පහකට අධික කාලයක් ජීවිතයත් මරණයත් අතර සටනක යෙදි සිටි ධීවරයින් දෙදෙනෙකුගේ දිවි ගලවා ගැනීමට මිරිස්සෙන් මුහුදු ගිය ධීවරයින් පිරිසක් කටයුතු කළ පුවතක් තංගල්ලෙන් අපට වාර්තා විය. අපි ඒ අපූරු පුවත සොයාගෙන ගියෙමු.
තංගල්ල පරාක්රම පාරේ පදිංචි ඒ.ඒ.චමිල් රොෂාන් ප්රියන්තට අයත් එක් දින යාත්රාවකින් මසුන් ඇල්ලීම සදහා තංගල්ල පදිංචි 48 හැවිරිදි ජේ.ඒ.ප්රදීප් ප්රියන්ත හා 40 හැවිරිදි චමින්ද කුමාරත් තංගල්ල ධීවර වරායෙන් මුහුදු ගියේ පසුගිය 29 වන දින දහවල් 2.30ට පමණය. රෑ තුන්යම මත්ස්ය අස්වැන්න එකතු කරගෙන අලුයම ගොඩබිම කරා පැමිණීම එක්දින ධීවර යාත්රාවල මුහුදු ගමනේ රටාවය.
එහෙත් වෙනදාට වඩා හැමදේම වෙනස් වූයේය. කාර්මික දෝෂයක් නිසා රෑ බෝ වනවිට යාත්රාව නැවතිනි. නැවතුන යාත්රාව පාලනයෙන් තොරව දියඹේ පාවෙන්නට වූයේය. පාලනයෙන් තොරව පාවෙන කුඩා බෝට්ටුව එක්වරම දියවැලකට හසුව රෑ මැදියම දී පෙරළී ගියේය. විසිවී ගිය විසිවි ගිය ධීවරයින් දෙදෙනා ගැඹුරු මුහුදේ ගිලී ගියහ.
ආයසයෙන් නොගිලී පිහිනා විත් උඩුකුරුව පෙරළී ගිය බෝට්ටුවේ එල්ලෙන්නට දෙදෙනාටම හැකි වූයේය. කිසිම හවුහරණක් නැත. මහා ඝන අන්ධකාරය පමණි. පෙනෙන තෙක් මානයක මිනිස් පුලුටක සේයාවක් සහිත එළි තිතක් නොවේ. සාමාන්යයෙන් එක් දින ධීවර යාත්රා මුහුදු ගොස් මත්ස්ය අස්වැන්න නෙලා ගැනීම ආරම්භ කරන අවස්ථාවේ දී යාත්රාව නවත්වා එළියක් පත්තු කරගනිති. එකිනෙකා පණිවිඩ හුවමාරු කරගනිති. එහෙත් දැන් ක්ෂිතිජය තෙක් එකම හිස් බවකි. ජීවිතය පිළිබඳ අනල්පවූ බලාපොරොත්තු නැත.
සිතලේ ගැහෙමින් බෝට්ටුවේ එලලීගේන දිය වැල් අතර ජීවිතය සහ මරණය අතර මහා අරගලයක යෙදී සිටි ඔවුන් දෙදෙනා ජීවිත බලාපොරොත්තු අත් නොහැර පෙරළුන ඔරුකඳහි එල්ලී උන්හ. වෙලාව ගත වන්නේ මොනතරම් හෙමින්දැයි වැටහෙමින් තිබිණි. ඒ හුදකලා දියඹේ දළ රැළි මැද පුරා පැය 05ක් යනු මහා විසාල කාලයකි. ඔරු කඳේ එල්ලී ජීවිතය යදිමින් සිටින මේ අසරණ මිනිසුන් දෙදෙනා දකින්නේ මිරිස්සෙන් මුහුදු ගිය වික්රම 02 බහුදින යාත්රාව ගොඩ බිම බලා එමින් සිටියදීය. ඔවුන්ව බහුදින ධීවර යාත්රාවේ පිරිස දකින විට පාන්දර 6.30ට පමණ ඇත. බෝට්ටුව පෙරළී දියඹේ පාවෙමින් සිටි ධීවරයින් දෙදෙනා ඒ මොහොතේ සිටියේ බෙහෙවින්ම දුර්වල අඩියකය. බහුදින යාත්රාව් නන්වාගත් ධීවරයින් දෙදෙනා දැන් නිවෙස්වලට පැමිණ සිටිති. ඔවුන් දැන් ඒ බිහිසුණු මොහොත ගැන කල්පනා කරති.
අප දැන් ඒ මාරක අත්දැකීම් ලද ධීවරයින් අසලය. ඉන් එක් ධීවරයෙක් වූ ජේ.ඒ. ප්රදීප් ප්රියන්ත සිය අත්දැකීමේ තිගැස්ම මෙසේ අප හමුවේ දිගහැරියේය.
“අපි තංගල්ල ධීවර වරායෙන් පසුගිය 29 වෙනිදා මුහුදු ගියේ. අපි සැතපුම් 17කත් විතර දුර ගිහින් තිබුණා. ඒ ගිහින් දැල් එළද්දී අපේ යාත්රාවෙ කාර්මික දෝෂයක් ආවා. සිද්ධිය වෙනකොට පහුවදා (30) පාන්දර 12.30ට විතර ඇති. අපි මේ ගැන බෝට්ටුවේ හිමි කරුට දැනුම් දුන්නා. ඔහු අපිට කිව්වා තවත් බෝට්ටුවක් රැගෙන එන්නම් කියලා.
එහෙම දැනුම් දීලා මහ වෙලාවක් ඉන්න ලැබුනේ නෑ. බෝට්ටුව දියවැළකට අහුවුනා. එහාට මෙහාට කැරකිලා බෝට්ටුව පෙරළුණා. අපි දෙන්නම මුහුදේ දියවැලට අහුවෙලා විසිවෙලා ගියා.
ඒත් කොහොම හරි ඒ දිය වැල මගහැරගෙන අපි දෙන්නම පෙරළුණ බෝට්ටුව ලඟට පිනාගෙන ඇවිත් බෝට්ටු කඳේ එල්ලුණා.
පැය පහකට වැඩිය වේලාවක් අපි දෙන්නා ජිවිතයත් මරණයත් අතර සටන් කලා. උදේ 07 විතර වෙනකම් බෝට්ටුවක් පේනතෙක් මානයක තිබුනේ නෑ. අපි හිතුවෙම අපිට ආයේ ජිවත් වෙන්න ලැබෙන එකක් නැ තියලයි. අපි මුහුද පිනමින් ඉන්නවා දැකලා තමයි වික්රම 02 කියන බහුදින යාත්රාව අපි ලගට ඇවිත් අපිව බේරා ගත්තේ.
බෝට්ටුවේ හිමිකරු ඒ.ඒ.චමිල් රොෂාන් ප්රියන්තය. මේ බිහිසුනු විපතේ මුල්ම අවස්ථාව ගැන මුලින්ම දැනගන්නේ ඔහුය.
මට මුහුදු ගිය දෙන්නා කෝල් කරලා කිවුවා බෝට්ටුවෙ කාර්මික දෝෂයක්… බෝට්ටුව දැන් නැවතිලා… මොකක් හරි කරන්න කියලා. ඒ වෙනකොට වේලාව මම හිතන්නේ පාන්දර 01ට විතර ඇති. මම ඉක්මනින්ම මේ පිළිබදව ධීවර පරික්ෂක කාර්යාලය හා නාවික හමුදා නිලධාරීන්වත දැනුවත් කරලා බෝට්ටුවකුත් සුදානම් කරගෙන තංගල්ල ධීවර වරායෙන් යන්න යනකොට මට දුරකතනයෙන් දැනුම් දුන්නා මිරිස්ස ධීවර වරායෙන්… ඔවුන් කිව්වා මුහුදු ගිය බහුදින ධිවර යාත්රාවකින් ධීවරයින් දොදෙනා බේරාගෙන එන බවට… ගිලුණ බෝට්ටුව හෝ එන්ජිම ගොඩගන්න උත්සාහයක් දරු තිබුණත් බැරිවෙලා තිබුණා…
ඔවුන් දෙන්නා බේරුන එක ගැන මහා සතුටක් දැනෙනවා. ඒත් දැල් ආම්පන්න එක්ක සිදුවුණු අලාභය රුපියල් ලක්ෂ 20කට ආසන්නයි. ඔහු කීවේය.
ප්රදීප් ප්රියන්ත චමින්ද කුමාර ලබා තිබුණේ මේ ලෝකයේ මිනිසෙක් ජීවිතයේ ලැබිය හැකි නරකම අත්දැකීමය. ජීවිතයට වඩා පෙනෙන්න් මරණයේ අඳුරය. පෙනේන මානයක මිනිස් පුලුටක් නැති මහා සාගරයේ පෙරළුන ඔරු කඳක එල්ලී බලාපොරොත්තු අත් නොහැර සිටි මේ මිනිසුන් දෙදෙනා අද සිය ඥාති හිතවතුන් සමග එක්ව හුස්ම ගනිති.
ඔවුන් කියන්නේ එකම දෙයකි. අමාරුම කාල පහුවේවි. බලාපොරොත්තු අත්නොහැර ජීවිතය වෙනුවෙන් සටන් කරන්න. නැතිවෙන්නට යන ජීවිත යළි ලබා ගත හැක්කේ ඒ මාර්ගයෙන් පමණි.
