ප්රධාන දීමනා තුනක් සහ ප්රවාහන දීමනාවක් ඇතුළු ඉල්ලීම් කීපයක් මුල් කරගෙන රජයේ වෛද්ය නිලධාරීන්ගේ සංගමය විසින් ක්රියාත්මක කළ වෛද්ය වර්ජනය හෙට උදෑසන 09න් අවසන් වූ පසු ඉදිරි ක්රියාමාර්ග ගැන සාකච්ඡා කර තීරණයක් ගන්නා බව රජයේ වෛද්ය නිලධාරින්ගේ සංගමයේ සභාපති විශේෂඥ වෛද්ය සංජීව තෙන්නකෝන් අද (24) මාධ්ය හමුවක් කැඳවා ප්රකාශ කළේය.
ඔවුන් වර්ජනය සිදුකරනු ලබන්නේ ශ්රී ලංකා වෛද්ය සේවය නමින් සුවිශේෂී සේවා ඛාණ්ඩයක් බිහි කිරීම, බාධක සූදානම්ව සිටීම හා ප්රවාහන සම්බන්ධව ඩැට් දීමනාව යාවත්කාලීන කිරීම, 22/99 චක්රලේඛයට අනුව ප්රවාහන ගැටලු විසඳීම, අමතර රාජකාරි දීමනාව ස්ථාවර දීමනාවක් බවට පත් කිරීම, පර්යේෂණ දීමනාවේ ගැටලු විසඳීම, යන ඉල්ලීම් මුල් කරගනිමිනි.
මෙම ගැටලු විසඳීමට අදාලව සෞඛ්ය අමාත්යවරයා ලිඛිත එකඟතාවයන් ලබා දී ඇතත් එම එකඟතා ක්රියාත්මක කිරීමට අපොහොසත් වීම නිසා මෙම වර්ජන ක්රියාවලියට ප්රවේශ වූ බව රජයේ වෛද්ය නිලධාරීන්ගේ සංගමය පවසයි.
රජයේ වෛද්ය නිලධාරීන්ගේ සංගමයේ සභාපති විශේෂඥ වෛද්ය සංජීව තෙන්නකෝන් කීවේ වෛද්යවරුන්ට පොදු සේවය සේ සැලකීම වෙනස් විය යුතු බවය. සිය දරුවන් පාසල්වලට යොමු කරවා ගැනීම වැනි මූල්යමය නොවන විසඳුම් ඉල්ලා සිටියත් ඒ සම්බන්ධව ද නිසි සැලකීමක් රජය විසින් දක්වා නැති බව සභාපතිවරයා පෙන්වා දුන්නේය.
වැටුප ගැන ප්රශ්නයක් නොමැති බවත් අවුරුද්දක් වැනි කාලයක් තිස්සේ සාකච්ඡා වාර ගණනාවකින් පසු සිය ඉල්ලීම්වලට නිශ්චිත පිළිතුරක් නැති නිසා මේ වැඩ වර්ජනයට එළඹුන බවත් ඔහු පෙන්වා දුන්නේය.
හෙටින් අවසන්වන සංකේත වැඩවර්ජනයෙන් පසුව සාකච්ඡා කර අවසන් තීරණයකට එළඹෙන බව ද සභාපතිවරයා කීවේය.
