තමා ජනාධිපති වුවහොත් පාස්කු ඉරිදා ප්රහාරයට වගකිවයුත්තන් වහාම නීතිය හමුවට පමුණුවන බව සමගි ජන බලවේගයේ නායක සජිත් ප්රේමදාස යළිත් වරක් පොරොන්දු වී තිබේ.
ප්රචාරක රැලියකදී අදහස් දක්වමින් ඔහු පාස්කු ප්රහාරයේ සත්යය හෙළිදරව් කිරීමට සහ ඛේදජනක සිදුවීමට වගවීම සහතික කිරීමට තම කැපවීම අවධාරණය කළේය.
“පාස්කු ප්රහාරයේ සත්ය සෙවීමට අප කැපවී සිටිනවා. මහ මොළකරුවන් පමණක් නොව පාස්කු ප්රහාරයට සම්බන්ධ සියලු පුද්ගලයන් සහ කණ්ඩායම් නීතිය හමුවට පමුණුවනවා,” සජිත් ප්රේමදාස සහතික වුනේය.
අතිඋතුම් මැල්කම් කාදිනල් රංජිත් හිමිපාණන්ගේ ප්රධානත්වයෙන් පැවති රදගුරු සමුළුවේදී ඔහු තම රජය පාස්කු ප්රහාරයේ වගකිවයුත්තන්ට උපරිම දඩුවම් ලබාදෙන බවට සහතික වී තිබිණි.
දේශපාලන වාසි තකා විශේෂයෙන්ම මැතිවරණ සමයේදී වැරදි තොරතුරු පැතිරවීම විවේචනය කළේය.
“මට මගේ පියාත් අහිමි වුණේ ත්රස්තවාදයෙන්. ඒ නිසා කරුණාකර මතක තබා ගන්න, මම, සජිත් ප්රේමදාස සහ මගේ කණ්ඩායම විනිවිදභාවයෙන්, වගකීමෙන් සහ වගවීමෙන් මෙම පාස්කු ප්රහාරයේ සුලමුල සෙවීමේ වගකීම අවංකව භාර ගන්නා බව” ඔහු ප්රකාශ කළේය.
“අපිරිසිදු දේශපාලනය” භාවිතා කිරීම හෙළා දකින අතර බොරු චෝදනාවලට නොමඟ නොයන ලෙසත් ඔහු ජනතාවගෙන් ඉල්ලා සිටියේය.
පාස්කු ප්රහාරයට තමා හෝ සමගි ජන බලවේගය සම්බන්ධ නැති බව ඔහු යළිත් අවධාරණය කළේය. “මේවා බැටළු වස්ත්ර ඇඳගත් වෘකයෝ. බැටළු ඇඳුමින් සැරසී සිටින මේ වෘකයෝ නැවතත් කතෝලික ප්රජාව සහ සමස්ත ජනතාව රැවටීමට උත්සාහ කරනවා” ඔහු අනතුරු ඇඟවීය.
ස්කොට්ලන්ඩ් යාඩ් සහ එෆ්බීඅයි වැනි ජාත්යන්තර නියෝජිතායතන විමර්ශනයට සම්බන්ධ කර ගැනීමට තම කැමැත්ත සජිත් ප්රේමදාස අවධාරණය කළේය.
