සූරියවැව නුවන් ජයසේකර –
ධාවනයට නුසුදුසු තත්වයේ තිබියදී මගීන් 70කට වැඩි පිරිසක්ද සමග බණ්ඩාරවෙල සිට මාතර දක්වා ගමන් කරමින් තිබූ වැල්ලවාය ඩිපෝවට අයත් ලංගම බස් රථයක් තණමල්විල පොලසිය විසින් තණමල්විල නගරයේදි නවතා එම බස් රථය තණමල්විල ඩිපෝව වෙත යොමුකර තිබේ.
බණ්ඩාරවෙල සිට ගමන් ආරම්භ කර ඇති මෙම බස් රථය පසුගිය ඉරිදා (15) මගීන් 70කට ආසන්න පිරිසක් සමග මාතර දක්වා ගමන් කරමින් සිට ඇත. එහිදී බස් රථය එක් පසෙකට ඉතා අනාරක්ෂිත ලෙස ඇලවී තිබියදීත් එය ඉදිරියටම මගීන් සමග ධාවනය කර තිබේ.
පසුව මේ සම්බන්ධයෙන් බස් රථයේ මගින් විසින් තණමල්විල මුලස්ථාන පොලිස් ස්ථානාධිපති ඩී.එම්.පී.බණ්ඩාරට දැනුම් දි ඇත. ඒ අනුව වහා ක්රියාත්මක වු ස්ථානාධිපතිවරයා පොලිස් නිධාරින් යොදවා අදාල බස් රථය තණමල්විල නගරයේදී නවතා පරික්ෂාවට ලක්කර තිබේ.
එහිදි පොලිස් නිලධාරීන්ටද දැක ගත හැකිව ඇත්තේ බස් රථයේ දෝෂයක් තිබියදි මගීන් සමගින් අනාරක්ෂිතව මෙය ධාවනය කර ඇති බවය.
පසුව පොලිස් නිලධාරීන් විසින් බස් රථය මාතර දක්වා ධාවනය කිරීම නවතා එම අවස්ථාවේදීම තණමල්විල ඩිපෝව වෙත එය යොමු කරවා මගීන්ගේ ආරක්ෂාව තහවුරු කර තිබේ. බස් රථය ඩිපෝව වෙත යොමු කර බස් රථයේ දෝෂය නිවැරදි කිරීමෙන් පසු යළි ධාරවනයට එක් කිරිමට පොලිසිය අවසර දී තිබේ.
