2016 වසරේදී රාජගිරිය ප්රදේශයේදී තරුණයකු රිය අනතුරකට ලක්කර බරපතළ තුවාල සිදුකිරීමේ සිද්ධිය සම්බන්ධයෙන් සාක්ෂි වසන් කිරීම ඇතුළු චෝදනා යටතේ නීතිපතිවරයා විසින් මහාධිකරණය හමුවේ නඩු පැවරීමට එරෙහිව විත්තිකාර පාඨලී චම්පික රණවක ගොනු කළ අභියාචනාව ශ්රේෂ්ඨාධිකරණය නිශ්ප්රභ කොට ඇතැයි කොළඹ මහාධිකරණ විනිසුරු සුජීව නිශ්ශංක ඊයේ (25දා) විවෘත අධිකරණය හමුවේදී දැනුම් දුන්නේය.
එම නඩුව පවරා පවත්වාගෙන යෑමට නොහැකි බවට පළමුවන විත්තිකරු ඉදිරිපත් කළ අභියාචනාව නිෂ්ප්රභ කළ ශ්රේෂ්ඨාධිකරණය විත්තිකරුවන්ට එරෙහිව නීතිපතිවරයා මහාධිකරණය හමුවේ ගොනු කර ඇති චෝදනා සම්බන්ධයෙන් නඩු විභාගය ඉදිරියට පවත්වාගෙන යන ලෙසට ද තම අධිකරණයට නියෝග කොට ඇතැයි ද වැඩිදුරටත් පෙන්වා දුන් මහාධිකරණ විනිසුරුවරයා නඩු විභාගය ලබන නොවැම්බර් 18 වැනිදා පැවැත්වීමට දින නියම කළේය.
2016.02.28 වැනිදා රාත්රි රාජගිරිය ප්රදේශයේදී සන්දීප් සම්පත් ගුණවර්ධන නමැති තරුණයා රිය අනතුරකට ලක්කිරීමේ සිද්ධිය සම්බන්ධයෙන් සාක්ෂි වසන් කිරීම ඇතුළු චෝදනා යටතේ එවකට අමාත්යවරයකු ලෙස කටයුතු කළ පාඨලී චම්පික රණවක, සහකාර පොලිස් අධිකාරි සුදත් අස්මඩල හා තුසිත දිදුම් කුමාර නමැති විත්තිකරුවන් තිදෙනාට එරෙහිව පවරා ඇති නඩුව අතිරේක සොලිසිටර් ජනරාල් ජනාධිපති නීතිඥ දිලීප පීරිස් මෙහෙයවන බව පෙන්වා දෙමින් රජයේ අධිනීතිඥවරයා කළ කරුණු දැක්වීම් සලකා බැලූ විනිසුරුවරයා නඩු විභාගය සඳහා එලෙස දින නියම කළේය.
එම නඩුවේ පළමු වන විත්තිකාර පාඨලී චම්පික රණවකට පනවා ඇති විදේශ ගමන් තහනම ඉදිරි නඩු දිනය දක්වා තාවකාලිකව අත්හිටුවීමට ද විනිසුරුවරයා වැඩිදුරටත් නියෝග කළේය.
සිය සේවාදායකයාට විදේශ රටක පැවැත්වෙන සම්මන්ත්රණයකට සහභාගි වීමට ආරාධනා ලැබී ඇති බවත් ඊට අමතරව ඔස්ට්රේලියාවේ සිටින ඔහුගේ දියණිය දැක බලාගැනීමට යෑමට අපේක්ෂා කරන බවත් කියමින් ඔහු වෙනුවෙන් පෙනී සිටි ජනාධිපති නීතිඥ සරත් ජයමාන්න කළ ඉල්ලීම සලකා බැලූ විනිසුරුවරයා එම නියෝගය කළේය. ( ඒ.ජේ.අබේනායක – දිවයින )
