කතරගම දේවාලයේ නැති වූ බව කියන රන් තැටිය දේවාලයට පූජා කර ඇත්තේ මීට මාස කිහිපයකට පෙර ඉන්දියාවේදී මිය ගිය අංගොඩ ලොක්කා නමැති පාතාල නායකයාගේ පාර්ශ්වය නියෝජනය කරන පාතාල ගැහැණියක් විසින් බව පොලිස් පරීක්ෂණවලදී හෙළි වී තිබේ.
මෙම රන්තැටිය 2019 වසරේදී දේවාලයට පූජා කර ඇති බවත් කුඩා දරුවකුගේ අසනීපයක් වෙනුවෙන් වූ භාරයක් ඔප්පු කිරීමට පවුම් 38ක රන් තැටිය මෙසේ පූජා කර ඇති බවත් අනාවරණය වී ඇත.
රත්නපුර කොලොන්න ප්රදේශයේ පදිංචිව සිටි මෙම කාන්තාව තවත් කිහිප දෙනකු සහ දරුවකු ද සමඟ කතරගම පැමිණ හෝටලයක නැවතී එහි සේවය කළ අරක්කැමියා මාර්ගයෙන් තම පූජා අවශ්යතාව දේවාලය වෙත දන්වා ඇත.
එයින් පසුව මෙම පවුම් 38ක රන් තැටිය දේවාලයට පූජා කර ඇතැයි පොලිස් විමර්ශනවලදී අනාවරණය වී තිබේ. කොළඹ අපරාධ කොට්ටාසය විසින් සිදු කරන ලද මෙම විමර්ශනවලදී තවදුරටත් හෙළි වී ඇත්තේ අදාළ පූජාව දේවාලයේ ප්රධාන කපු මහතා වන සොමිපාල රත්නායක විසින් භාර ගනු ලැබ ඇති බවය.
මෙම රන් තැටිය අතුරුදන්ව ඇති බවට කතරගම දේවාලයේ බස්නායක නිලමේවරයා වන ඩිල්ෂාන් ගුණසේකර විසින් පසුගියදා පොලිසිය හමුවේ පැමිණිල්ලක් කරන ලද අතර පොලිස්පතිවරයාගේ නියමයෙන් කොළඹ අපරාධ කොටඨාසය විසින් එහි විමර්ශන ආරම්භ කරන ලදී.
මේ සම්බන්ධයෙන් විමර්ශන සිදුවන අතරතුර පසුගිය ඔක්තෝබර් 26 වැනිදා බස්නායක නිලමේ කාර්යාලයට පැමිණි බාහිර පුද්ගලයකු විසින් රන් තැටියක් ගෙනැවිත් දේවාලයේ පරිපාලන ලේකම්වරයා වෙත භාර දී ඇත්තේ එය දේවාලයේ ප්රධාන කපු මහතාගේ නිවසේ තිබූ බව පවසමිනි.
මේ වනවිට මෙම රන් තැටිය දේවාලයේ තැන්පත් කර ඇති අතර ප්රධාන කපු මහතා වන සොමිපාල රත්නායක ප්රකාශ කරන්නේ තමන්ගේ නිවසේ තිබී එවැනි රන් තැටියක් භාර නොදුන් බවය. ප්රධාන කපු මහතා වන තමන් බාහිර පුද්ගලයකු අත රන් තැටියක් දේවාලයට යැවීමට තරම් මෝඩයකු නොවන බව ද ප්රකාශ කර තිබේ.
ඔහු පවසා ඇත්තේ මෙම රන් තැටිය භාර දී ඇත්තේ දේවාලයේ ගබඩා භාරකාර කපු මහතාගේ සහෝදරයකු විසින් යැයි එම පුද්ගලයා පවසා ඇති බවය.
තමන්ගේ නිවසේ තිබී රන් තැටිය රැගෙන ආ බව කියන එම පුද්ගලයාට එරෙහිව නීතිමය පියවර ගන්නා බව ප්රධාන කපු මහතාවන සොමිපාල රත්නායක පවසා තිබේ.
ඔහු තවදුරටත් පවසන්නේ මෙම රන් තැටිය හැදුවේ කවුද එය ආවේ කෙසේද ආදී තොරතුරු අපරාධ පරීක්ෂණ දෙපාර්තමේන්තුව වෙත ලබා දීමට තමන් ක්රියා කරන බවය.
කෙසේ වුවද ලංකසරට අනාවරණය වන ආකාරයට දේවාලය තැබුණු රන් තැටිය සම්බන්ධ විමර්ශන තවදුරටත් සිදු කෙරෙමින් පවතී.
