ශ්රියානි විජේසිංහ –
පසුගිය කාලයේදී අතරමැදි ශ්රේණිවලට සිසුන් ඇතුළත් කළ අන්දමට සිසුන් ඇතුළත් කර ගැනීමට නොහැකි බව අධ්යාපන අමාත්යංශයේ ලේකම්වරයා පවසා සිටියි.
අතරමැදි ශ්රේණි සඳහා සිසුන් ඇතුළත් කර ගැනීමට විවිධ පාර්ශ්වයන්ගෙන් දිගින් දිගටම ඉදිරිපත්වන ඉල්ලීම් ප්රායෝගික හේතු මත සලකා බැලිය නොහැකි වී ඇත්තේ අක්රමවත්ව ළමුන් ඇතුළත් කිරීම නිසා යැයි අගමැතිවරිය පාර්ලිමේන්තුවේදී පවා ප්රකාශ කළ බව ලේකම්වරයා පෙන්වාදේ.
බොහෝ පංතිවලට දරුවන් 50-60ක් ඉක්ම වූ සංඛ්යාවක් ඇතුළත් කර ඇති බැවින් එම ආකාරයට ළමුන් ඇතුළත් කර ගත නොහැකි බවත් මේ වසරේදී වඩාත් විධිමත් අයුරින් අතරමැදි ශ්රේණිවලට ළමුන් ඇතුළත් කර ගැනීමේ චක්රලේඛය ඉක්මනින් ඉදිරිපත් කිරීමට කටයුතු කරන බවත් හෙතෙම පවසා සිටියි.
මේ සම්බන්ධයෙන් අධ්යාපන අමාත්යංශය වෙත පැමිණි ගුරුවරුන් තමන් උගන්වන පාසලට තම දරුවන් ඇතුළත් කර ගැනීමට අවස්ථාව ලබා දෙන මෙන් කළ ඉල්ලීම්වලට අනුව ඔවුන් සමඟද සාකච්ඡා කළ බව ලේකම්වරයා කීය.
