නෙළුම් කුලුනෙන් පැන්න දියණියගේ මරණයට එහි ආරක්ෂක අංශවල දුර්වලතාවයත් බලපාලා… විමර්ශනවලදී හෙළි වෙයි…

• දෙවරක් කුලුනෙන් පනින්න කළ උත්සාහය අසාර්ථක වෙලා… ඇය පැන ඇත්තේ තුන්වැනි වාරයේ කළ උත්සාහයෙන්…

• පාසල් ඇඳුමින් පැමිණ සාමාන්‍ය ඇඳුමක් ඇඳන් තියෙන්නේ නෙලුම් කුලුන පරිශ්‍රයට ඇවිත්… ඇය විනාඩි 20ක් නෙලුම් කුලුන පරිශ්‍රයේ රැඳි සිටලා….

• නැරඹුම් පීඨිකාවේ ආරක්ෂකයො 5 දෙනෙක් හිටියත් ඔවුන්ට ඇයගේ හැසිරීම ගැන සැක හිතුනෙ නෑ ලු… සීසීටීවී පද්ධතිය සජීවීව නිරීක්ෂණය වෙලා නෑ…

• දැරිය නිරීක්ෂණ පීඨිකාවෙන් පැන්නා කියලා දැනගෙන තියෙන්නේ ඇය පැනල විනාඩි 10කට පස්සේ ඇයගේ සිරුර තුන් වැනි මහලෙන් හමුවුනාම….

නෙළුම් කුලුනෙන් පැන සිය දිවි නසා ගත් පාසල් සිසුවියගේ මරණයට නෙළුම් කුලුනේ ආරක්ෂක දුර්වලතා ද හේතු වූයේ දැයි විමර්ශන අංශවල අවධානයට ලක් වී තිබේ.

විමර්ශනයේදී හෙළිවන තොරතුරුවලට අනුව සිසුවිය නෙළුම් කුලුන පරිශ්‍රයට ඇතුළු වූ මොහොතේ සිට සියදිවි හානිකර ගන්නා අවස්ථාව දක්වා විනාඩි විස්සක පමණ කාලයක් නෙළුම් කුලුන පරීශ්‍රයේ රැඳී සිට ඇත. මේ සියලුම කාලය ආවරණය කරන දර්ශන සීසීටීවී පද්ධතියේ සටහන් වී තිබේ.

පාසල් නිල ඇඳුමින් නෙළුම් කුලුනට ප්‍රවේශවන ඇය අනතුරුව සිය පාසල් බෑගය තුළ සඟවාගෙන පැමිණ සිටි සාමාන්‍ය ඇඳුමකට මාරු වී ඇත්තේ නෙලුම් කුලුන පරිශ්‍රය තුළදී ය.

අදාල සීටීටීවී දර්ශන නිරීක්ෂණය කරන විමර්ශන අංශවලට පෙනී ගොස් ඇත්තේ 29 වැනි මහලේ නැරඹුම් පීඨිකාවට ඇතුළු වීමෙන් අනතුරුව මෙම සිසුවිය කෙළින්ම ඇයගේ මිතුරා සහ මිතුරිය සිය දිවි නසා ගත් ඇල්ටෙයාර් මහල් නිවාස සංකීර්ණය පැහැදිලිවම දිස්වන ප්‍රදේශයට යන ආකාරය ය.

එතැන සිට ඇය විනාඩි දෙකක පමණ කාලයක් ඇල්ටෙයාර් මහල් නිවාස සංකීර්ණය දෙස බලා සිටයි. අනතුරුව ඇය නෙළුම් කුලුනේ පීඨිකාව වටා ගමන් කරයි. වට දෙකක් කැරකැවුණු ඇය ගැට්ටක් මත සිය ගමන් මල්ල තබා මඳ වේලාවක් දිගු කල්පනාවක සිටියි. අනතුරුව නැගී සිට කුලුනෙන් බිමට පැනීමට උත්සාහ කරයි. පළමු උත්සාහය මග හැරෙන්නේ නෙළුම් කුලුනේ නැරඹුම් පීඨිකාව වටා ඇති උස් තාප්ප කොටසට නැඟීමට ඇය අපොහොසත් වන බැවිනි.

පළමු අසාර්ථක උත්සාහයෙන් පසු මඳ වේලාවක් නැවත ඇය ගැට්ට මත ඉඳගෙන ඇල්ටෙයාර් මහල් නිවාස සංකීර්ණය දෙස බලා සිටින ආකාරය සීසීටීවී දර්ශනවල පෙනේ. අනතුරුව යළිත් වරක් නැගිට පැමිණ බැම්මෙන් පනින්නට වෙර දරයි. නැරඹුම් පීඨිකාව වටා ඇති බැම්මට උඩින් තවත් ආරක්ෂක කම්බියක් ඇති බැවින් එවරද ඇයට බිමට පැනීම නොහැකි වෙයි. අවසානයේදී ඇය සිය සපත්තු දෙක ගලවා දමයි. එවිට මෙතෙක් බාධකයක් වූ බැම්මට නැගීමට වෙර ගැනීමේ අපහසුව නැති වෙයි. අනතුරුව ඇය බිමට පනී.

මේ සියලු දර්ශන සීසීටීවී පද්ධතියේ සටහන්ව ඇත. මිනිසුන් වැඩි වශයෙන්ම ගැවසෙන මෙම ප්‍රදේශයේ සීසීටීවි පද්ධතිය නිරන්තරව නිරීක්ෂණය වූයේ නම් මේ සිද්ධිය මග හැරෙන්නට තිබුණ බව ආරක්ෂක අංශවල මතය වී තිබේ.

එමන්ම මේ අවස්ථාවේ ආරක්ෂක අංශවල පුදගලයින් 05 දෙනෙක් මෙම පීඨිකාවේ සේවයට යොදවා තිබූ බව නෙලුම් කුලුණ සමාගම ප්‍රකාශ කරයි. එහෙත් ආරක්ෂක කැමරා දර්ශන නිරීක්ෂණය කළ පොලිස් විමර්ශනයේදී පෙනී ගොස් ඇත්තේ සිය දහස් ගණනක් දිනකට සැරිසරන නෙළුම් කුලුනේ නැරඹුම් පීඨිකාවේ ආරක්ෂාව සම්බන්ධයෙන් ආරක්ෂක අංශ යම් අවධානයකින් සිටියා නම් මේ දියණියගේ ජීවිතය රැක ගැනීමට අවස්ථාවක් තිබූ බවය.

මේ තරම් ආරක්ෂාවක් ඇතැයි කියන නෙළුම් කුලුනෙන් ඇය ඉහළ සිට බිමට වැටී ඇති බව පවා දැන ගන්නේ තෙවැනි මහලේ විවෘත කොටසේ බිම තිබී ඒ දියණියගේ සිරුර හමුවීමත් සමඟය. මීටර් 250කට වැඩි උසකින් වැටුණු ඇගේ ප්‍රාණය ඒ වනවිටත් නිරුද්ධ වී තිබී ඇත. මරණය සම්බන්ධයෙන් පරීක්ෂණ පැවැත්වීමට පොලීසිය මැදිහත් වන්නේ නෙළුම් කුලුනේ පරිපාලකයකු කළ පැමිණිල්ලකට අනුවය.

මේ පිළිබඳව නෙළුම් කුලුන පරිපාලනය කියන්නේ මෙවැන්නකි.

” ගොඩනැඟිල්ලෙහි නැරඹුම් මැදිරිය තුළ සිදුවිය හැකි අනතුරු වැළකීම සඳහා සවිකර ඇති ආරක්ෂක වැට ජාත්‍යන්තර ප්‍රමිතීන්ට අනුව නිම කර තිබුණත් පසුගියදා එම නැරඹුම් මැදිරියෙන් පැන සිසුවියක් සිය දිවි හානිකර ගැනීම පිළිබඳ කළමනාකාරීත්වය ලෙස අප ඉතා කනගාටු වෙනවා.

එම සිසුවිය නැරඹුම් මැදිරියේ රැඳී සිටින අවස්ථාවේ අප කාර්ය මණ්ඩලයේ පස් දෙනකු රාජකාරියේ නියැළී සිටියා. ඔවුන් නැරඹුම් මැදිරිය වටාම ඇවිදමින් නිරීක්ෂණයේ යෙදී සිටින අතර, ඔවුන්ගේ නිරීක්ෂණය ඇය වෙත යොමු වු අවස්ථාවල ඇය කිසිදු කලබලයකින් තොරව අවට නරඹමින් සිටි නිසා ඇය සියදිවි නසාගැනීමේ අරමුණින් පැමිණි බවට සැකයක් ඇති වී නැහැ.

ඇය දෙවරක් පැනීමට උත්සාහ කළ බව ආරක්ෂක කැමරා තුළින් නිරීක්ෂණය වුවත් ඒ තත්තර කිහිපයක් තුළ සිදුවූ එවැනි ක්ෂණික සිදුවීමක් වළක්වා ගැනීමට ප්‍රායෝගිකව නොහැකියි. ඊට හේතුව සියදිවි නසාගැනීමේ සැලසුමක් ඇතිව පැමිණි පුද්ගලයකුගේ මනෝ ස්වාභාවය හඳුනා ගැනීමට නොහැකි වීමයි.

එසේ වුවද මෙම අවාසනාවන්ත සිදුවීමෙන් පසුව එවැනි සිදුවීම් සහ විනාශකාරි කටයුතු මැඩ පැවැත්වීමට නුතන තාක්ෂණික උපකරණ යොදාගැනීමට අප කටයුතු කරනවා. විදෙස් රටවල ශාරීරික උෂ්ණත්වය පරීක්ෂා කිරීමෙන් පුද්ගල මනෝ භාවයන් හඳුනාගත හැකි අධි තාක්ෂණ උපකරණ සහ ක්‍රමවේද භාවිත වනවා. එවැනි ආරක්ෂිත ක්‍රියාමාර්ග පිළිබඳ ද අපගේ අවධානය යොමුකර තිබෙනවා – (සිළුමිණ – ගයාන් කුමාර වීරසිංහ/ සුරේකා ඉලංකෝන්)