දිනසේන රතුගමගේ –
දෙමළ ජාතික සන්ධානයේ එම්.ඒ.සුමන්තිරන් මන්ත්රීවරයා හා ජනාධිපති අපේක්ෂක නාමල් රාජපක්ෂ අතර සාකච්ඡාවක් පැවති පමණින් දෙමළ ජාතික සන්ධානයේ සහය නාමල් රාජපක්ෂ මහතාට ලබා දෙන බවට තීන්දු තීරණ නොගන්නා ලෙස දෙමළ ජාතික සන්ධානය විසින් නිවේදනයක් නිකුත් කරමින් අද (11) දා ප්රකාශ කොට තිබේ.
කොළඹදී පැවති හදිසි හා විශේෂ හමුවකදී ජනාධිපතිධූර අපේක්ෂක නාමල් රාජපක්ෂ හා සුමන්තිරන් මන්ත්රීවරයා අතර සාකච්ඡාවක් පැවති බව සත්ය නමුත් දෙමළ ජාතික සන්ධානයේ සහය ඔහුට ලබා දීමට තීරණය කොට ඇති බවට පලවන වාර්තා අසත්ය බව එම නිවේදනයේ සඳහන් වෙයි.
මේ සාකච්ඡාවේදී උතුරු නැගෙනහිර පලාත්වල දැනට පවතින අර්බුද ගැටලු හා ප්රශ්න පිළිබඳව දෙදෙනා විශාල කාලයක් සාකච්ඡා කළ බව දෙමළ ජාතික සන්ධානය ප්රකාශ කරයි.
එහිදී තමන් ජයග්රහණය කළහොත් උතුරු නැගෙනහිර දෙමළ පාර්ලිමේන්තු මන්ත්රීවරුන් සමඟ එක්ව කලාපයේ ජනතාවගේ දුක් ගැනවිලි විසඳීමට සහ තරුණ තරුණියන්ට ජීවනෝපාය සහ යහපත් අනාගතයක් ලබාදීමට සූදානම් බව නාමල් රාජපක්ෂ සුමන්තිරන් මන්ත්රීවරයාට සහතික වූ බව දෙමළ ජාතික සන්ධානය සදහන් කරයි.
උතුරු සහ නැඟෙනහිර පුරවැසියන්ට සුබ අනාගතයක් ඇති කර එම දිස්ත්රික්ක වල ජාත්යන්තර වෙළෙඳ මධ්යස්ථාන පිහිටුවා ඒ තුළින් පළාත් දෙකම සංවර්ධනය කිරීමට නාමල් රාජපක්ෂ බලාපොරොත්තු වන බවද සුමන්තිරන් මන්ත්රීවරයාට ප්රකාශ කළ බව එම පක්ෂ නිවේදනයේ සඳහන් වෙයි.
කෙසේ වෙතත් ජනාධිපතිවරණයේදී දෙමළ ජාතික සන්ධානයේ සහය දක්වන්නේ කාහට දැයි මෙතෙක් තීරණය කොට නොමැති බවත් එම තීරණය ගැනීම පිණිස දෙමළ ජාතික සන්ධානයේ මධ්යමකාරක සභාවේ විශේෂ සාකච්ඡාවක් ඉතා ඉක්මනින්ම පවත්වන බවත් දෙමළ ජාතික සන්ධානය වැඩිදුරටත් ප්රකාශ කොට තිබේ.
