පොලිස් මත්ද්රව්ය නාශක කාර්යංශයේ නිලධාරීන් සම්බන්ධ මත්කුඩු ජාවාරමේදී කලකට ඉහතදී පාකිස්ථානයෙන් ගෙන්වූ කුඩු තොගය සමඟ ලබා දුන් බව කියන ගිවි අවි පහෙන් මෙතෙක් සොයා ගත නොහැකිව තිබූ ගිනි අවි හතරක් අද කොළඹ අපරාධ කොට්ඨාසය මඟින් අත්තිඩිය ප්රදේශයේදී සොයා ගන්නා ලදී.
ගල්කිස්ස, අත්තිඩිය, ඉදිගහදෙනිය පාර ආසන්නයේ අත්තිඩිය අභය භූමියට අයත් ළඳු කැලෑවක් තුළ මෙම 0.30 පිස්තෝල වර්ගයේ ගිනි අවි 04 සඟවා තිබී ඇති අතර එම ගිනි අවි සඳහා යොදනු ලබන හිස් මැගසින් අටක් අද දින (02) කොළඹ අපරාධ කොට්ඨාසය මගින් අත්අඩංගුවට ගත් බව පොලීසිය පැවසීය.
එම ළදු කැලෑව මාර්ගයෙන් ගමන් ගත් පුද්ගලයෙකු යම් පාර්සලයක් සගවන ආකාරය දුටු ප්රදේශවාසියකු ඒ බව කොළඹ අපරාධ කොට්ඨාසයේ ස්ථානාධිපති ප්රධාන පොලිස් පරීක්ෂක එරංග ප්රනාන්දු මහතාට ලබා දුන් තොරතුරක් මත මෙම සොයා ගැනීම සිදු කෙරිණි.
පසුගියදා මත්ද්රව්ය ජාවාරම් සිදු කිරීම හේතුවෙන් අත්අඩංගුවට පත්වු මත්ද්රව්ය නාශක කාර්යාංශයේ පොලිස් නිලධාරින් අතර සිටි උප පොලිස් පරීක්ෂකවරයෙකු සන්තකයේ මෙම වර්ගයේ පිස්තෝලයක් තිබී සොයාගත් බවත් එම නිලධාරීන් විසින් මත්ද්රව්ය තොගයක් සහ මෙම ගිනි අවි 04 බඩෝවිට රජිත නොහොත් ලොකු නැමැති පුද්ගලයාට සඟවා තැබීම සඳහා ලබා දී ඇති බවත් මූලික පොලිස් පරීක්ෂණවලදී හෙළි වී ඇති බව අපරාධ කොට්ඨාශය පැවසීය.
දැනට අත්අඩංගුවේ පසු වන මත්ද්රව්ය නාශක කාර්යාංශයේ උප පොලිස් පරීක්ෂකවරයකු සන්තකයේ තිබී සොයාගත් ගිනි අවිය සහ මෙම ගිනි අවි සමාන ඒවා වන අතර එම නිලධාරීන් පිරිස අත්අඩංගුවට ගැනීමත් සමග බඩෝවිට රජිත නොහොත් ලොකු නැමැති මත්ද්රව්ය ජාවාරම්කරු රටින් පළා ගොස් ඉන්දියාවේ සැඟවී සිටින බවත් පොලිසිය විසින් අනාවරණය කර ගෙන ඇත.
