ලෝක බැංකු ආධාර යටතේ ඔස්ට්රේලියානු සමාගමකින් ගෙනිවන ලද දිලීර ආසාදිත අර්තාපල් බීජ අල මෙට්රික් ටොන් 21 ක ප්රමාණය එකඟ වූ ආකාරයට යාපනයේ වළ දැමීමට යාමේදී එල්ල වූ දැඩි විරෝධයක් නිසා එම බීජ අල කිළිනොච්චියේ වනගත ප්රදේශයක වළ දැමීම සදහා රැගෙන ගොස් තිබේ.
මීට පෙර පැවති සාකච්ඡාවකදී යාපනයේ අල ගොවීන් එම නරක් වූ බීජ අල තොගය යාපනයේ වළ දැමීමට එකඟ වූවත් යාපනයේ පරිසර සංවිධාන හා තවත් ගොවි සංවිධාන කීපයක් ඊට තරයේම විරෝධය පලකිරීම නිසා එම බීජ අල තොගය මනුෂ්ය ජනාවාස වලින් තොර ප්රදේශයක වළ දමා විනාශ කිරීමට ඊයේ (03) යාපනයේ කෘෂිකර්ම නිලධාරීන්ට සිදු විය.
යාපනයේ කුප්පිලාන් ප්රදේශයේ ගබඩාවක මෙම බීජ අල තොගය ගබඩා කිරීමෙන් පසුව දැඩි දුර්ගන්ධයක් මුළු පළාත පුරාම පැතිර යන්නට වූ අතර ඒවා වළ දැමීම සදහා යළි පොලිතීන් උර වළට බහාලීමේදී ඊට වඩා දැඩි දුගධක් පළාත පුරා පැතිර ගොස් තිබේ.
කෘෂිකර්ම නිලධාරීන් විසින් කම්කරුවන් පිරිසක් යොදා ගෙන එම නරක් වූ බීජ අර්තාපල් තොගය ඉතා සියුම් ලෙස පොලිතීන් බෑග් වල අසුරා කිළිනොච්චියේ මහ කැළයක් වෙත රැගෙන ගොස් විනාශ කොට දමා තිබේ.
ඕස්ට්රෙලියානු සමාගමක් විසින් යාපනයට එවා තිබූ එම බීජ අල මෙට්රික් ටොන් 21 ක ප්රමාණය Pectobacterium keratophorum නැමති දිලීර රෝගය නිසා නරක් වී කුණු වීමෙන් පසුව ඒ වෙනුවට අලුතින් බීජ අල යාපනයේ අල ගොවීන් වෙත ලබා දීමට එම සමාගම එකඟ වී තිබේ.
