මුදල් විශුද්ධීකරණය වැළැක්වීමේ පනත යටතේ චෝදනා ලබා සිටි, හිටපු ජනාධිපති මහින්ද රාජපක්ෂගේ පුත් යෝෂිත රාජපක්ෂගේ මිත්තණිය වන ඩේසි ෆොරස්ට්ට නඩු විභාගයකට මුහුණදීමට තරම් සුදුසු මානසික තත්ත්වයක් නොමැති බවට වෛද්ය වාර්තා මගින් තහවුරු වී තිබේ.
ඒ අනුව ඇයව අදාළ නඩුවෙන් නිදහස් කිරීමට කොළඹ මහාධිකරණය අද (25) නියෝග කළේය.
පසුගිය නඩු වාරයේ දී විත්තිකාරියගේ මානසික සෞඛ්ය තත්ත්වය පරීක්ෂා කර වාර්තාවක් ඉදිරිපත් කරන ලෙස අධිකරණය විසින් කොළඹ අධිකරණ වෛද්ය නිලධාරියා වෙත නියෝග කර තිබුණි. ඒ අනුව කැඳවා තිබූ විශේෂ මානසික වෛද්ය වාර්තාව අද දින නියෝජ්ය සොලිසිටර් ජනරාල් ජනක බණ්ඩාර විසින් අධිකරණයට ඉදිරිපත් කරනු ලැබීය.
එම වාර්තාව මගින් විත්තිකාර ඩේසි ෆොරස්ට් නඩු විභාගයකට මුහුණදීමට සුදුසු මානසික මට්ටමක පසුවන්නේ නැති බවට වෛද්ය නිර්දේශ නිකුත් කර ඇති බව නියෝජ්ය සොලිසිටර් ජනරාල්වරයා අධිකරණයට දැනුම් දුන්නේය.
ඉදිරිපත් වූ කරුණු සලකා බැලූ මහාධිකරණ විනිසුරුවරයා, ඇයට එරෙහිව ගොනු කර තිබූ අධිචෝදනාවලින් ඇය නිදහස් කිරීමට නියෝග කළේය.
ඩේසි ෆොරස්ට් ට එරෙහිව මෙම නඩුව පවරා තිබුණේ රුපියල් මිලියන ගණනක වටිනාකමකින් යුත් ඉඩමක් මිළදී ගැනීම සඳහා වැය කළ මුදල් උපයා ගත් ආකාරය හෙළි නොකිරීම ඇතුළු මුදල් විශුද්ධීකරණය වැළැක්වීමේ පනත යටතේ එල්ල වූ චෝදනාවලට අදාළවය. මෙය රටම හිනැස්සු කුප්රකට ඩේසි ආච්චිගේ මැණික් මල්ල සිද්ධිය සම්බන්ධ නඩුවය.
මෙම නඩුවට පාදක වූයේ රත්මලාන ප්රදේශයෙන් රුපියල් මිලියන ගණනක වටිනාකමකින් යුත් ඉඩමක් මිළදී ගැනීම සඳහා ඩේසි ෆොරස්ට්ට මුදල් ලැබුණු ආකාරය පිළිබඳවයි.
මූල්ය අපරාධ විමර්ශන කොට්ඨාසය (FCID) ඇයව ගෙන්වා ඇයගෙන් ප්රශ්න කිරීමේ දී ඇය ලබා දුන් ප්රකාශය වූයේ නාඳුනන පුද්ගලයෙකු පැමිණ ඇයට මැණික් මල්ලක් ලබා දුන් බවය. පසුව එම පුද්ගලයාම නැවත පැමිණ, මැණික් මල්ල ආපසු රැගෙන ඒ වෙනුවට ඇයට රුපියල් කෝටි ගණනක මුදල් මල්ලක් ලබා දුන් බව ඇය කීවාය.
එම මුදල් භාවිතා කරමින් ඇය රත්මලාන ප්රදේශයෙන් රුපියල් මිලියන 34කට ආසන්න වටිනාකමකින් යුත් ඉඩමක් මිලදී ගත් බවත් පසුව එම ඉඩම මුණුබුරෙකු වන යෝෂිත රාජපක්ෂ ට පැවරූ බවත් ඇය ප්රකාශ කළාය.
එම මැණික් ලබාදුන් පුද්ගලයා කවුරුන්ද යන්න හෝ මැණික් අලෙවි කළ ආකාරය පිළිබඳව නිසි සාක්ෂි ඉදිරිපත් කිරීමට එදා අපොහොසත් වීම හේතුවෙන් මෙය ‘ ඩේසි ආච්චිගේ මැණික් මල්ලේ අභිරහස’ ලෙස පසුගිය කාලයේ මහත් ආන්දෝලනයකට තුඩු දුන්නේය.
