අල්ලස් හෝ දූෂණ චෝදනා විමර්ශන කොමිසම විසින් අද අත්අඩංගුවට ගත් ශ්රී ලංකා ඉඩම් ගොඩකිරීමේ සහ සංවර්ධනය කිරීමේ සංස්ථාවේ හිටපු සාමාන්යාධිකාරීනී ශ්රීමතී මල්ලිකා කුමාරි සේනාධීර ඇප මත මුදා හැරීමට කොළඹ ප්රධාන මහේස්ත්රාත් තනුජා ලක්මාලි අද නියෝග කළාය.
රුපියල් ලක්ෂ 5 බැගින් වූ ශරීර ඇප දෙකක් මත සැකකාරිය මුදා හැර තිබිණි.
අල්ලස් කොමිසම විසින් මෙසේ අත් අඩංගුවට ගනු ලැබුවේ ඉඩම් ගොඩකිරීමේ සහ සංවර්ධනය කිරීමේ සංස්ථාවේ හිටපු සාමාන්යාධිකාරී එම්.ආර්. ශ්රීමති මල්ලිකා කුමාරි සේනාධීර ය.
ශ්රී ලංකා ඉඩම් ගොඩකිරීමේ හා සංවර්ධනය කිරීමේ සංස්ථාව යටතේ ක්රියාත්මක කර ඇති වේරැස් ගඟ ව්යාපෘතියේ පළමු අදියර විවෘත කිරීමේ උත්සව කටයුතු වෙනුවෙන් ප්රසම්පාදන ක්රමවේදයෙන් බැහැරව ආයතනයක් තෝරාගනිමින් එම ආයතනය වෙත වාසියක් සිදු කිරීම හා එම උත්සවය සඳහා ව්යාපෘති අරමුදලින් කිසිදු මුදලක් වෙන් කර නොතිබියදී එම උත්සවය සඳහා ව්යාපෘති අරමුදලින් රුපියල් ලක්ෂ 276ක මුදලක් වැය කිරීමෙන් රජයට පාඩුවක් සිදු කිරීමෙන් “දූෂණය” නමැති වරද සිදුකිරීම මත අල්ලස් හෝ දූෂණ විමර්ශන කොමිසම ඇයව අත් අඩංගුවට ගෙන තිබිණි.
අත්අඩංගුවට ගන්නා ලද සැකකාරිය කොළඹ ප්රධාන මහේස්ත්රාත් අධිකරණය වෙත ඉදිරිපත් කරන ලදී .
