මනම්පිටිය නිමල් ජයරත්න –
වැලිකන්ද ප්රාදේශීය සංවර්ධන කමිටු රැස්වීමේ දී පක්ෂ විපක්ෂ භේදයකින් තොරව රාජ්ය අමාත්යවරයෙකු ඇතුළු පාර්ලිමේන්තු මන්ත්රීවරුන් දෙදෙනෙකු රාජ්ය නිලධාරීන් හා එක්ව වැලිකන්ද සුරියවැව රක්ෂිතය විනාශ කිරිම වහාම නතර කරන ලෙසට ලබාගත් තීරණය තුට්ටුවකට මායිම් නොකර කැලෑපාලුවන් පිරිසක් එම රක්ෂිතයට ඩෝසර්, ජේ.සී.බී යන්ත්ර යොදා තවදුරටත් විනාශ කරමින් සිටින බව ප්රදේශයේ මහා සංඝරත්නයත් පරිසරවේදීහු සහ ගොවිජනතාවත් හෙළිදරව් කරති.
අලි මිනිස් ගැටුම උග්ර කරමින් සිදුවෙමින් ඇති ව්යසනය සම්බන්ධව සමාලෝචනයකින් අනතුරුව ඉකුත් 19 වැනිදා වැලිකන්ද සංස්කෘතික මධ්යස්ථානයේදී රැස්වුණු ප්රාදේශීය සංවර්ධන කමිටු රැස්වීමේදී වැලිකන්ද සූරියවැව රක්ෂිතය මහා පරිමාණයෙන් විනාශ කිරීම නතර කිරීමට ඒකමතිකව තීරණය කළේය.
මහමාර්ග රාජ්ය අමාත්ය සිරිපාල ගම්ලත් , ශ්රී ලංකා පොදුජන පෙරමුණේ පොලොන්නරු දිස්ත්රික් පාර්ලිමේන්තු මන්ත්රී දිස්ත්රික් සංවර්ධන කමිටුවේ සභාපති ජගත් සමරවික්රම සමගි ජන බලවේගයේ පාර්ලිමේන්තු මන්ත්රී කින්ස් නෙල්සන් මෙන්ම වැලිකන්ද ප්රදේශයේ රාජ්ය ආයතන ප්රධානීන්ගේ සහභාගිත්වයෙන් එම රැස්වීම් පැවත්විනි.
එහිදී කමිටු පක්ෂ විපක්ෂ සියලුම දේශපාලන බලධාරීන් එක් මතකයට පැමිණ නිලධාරීන්ගේ දත්ත සමාලෝචන මත සූරියවැව රක්ෂිතයේ සිදුකරන වන සංහාරය වහාම නතර කරන ලෙසට ඒකමතිකව තීරණය කළේය.
බඩඉරිඟු වගාවක් සිදු කිරීමට බව පවසමින් සූරියවැව රක්ෂිතයේ අක්කර 1500 ක බිම් ප්රමාණයක් ආයෝජකයින් 29 දෙනකු සඳහා අක්කර හතළිස් 49 බැගින් වසර පහක කාලයක් සඳහා පශු සංවර්ධන මණ්ඩලය විසින් ලබාදී ඇති බවට මෙහිදී කරුණු අනාවරණය වුණි,
විනාශ වන රක්ෂිතය වන අලින්ගේ වාසස්ථානයක් බවත් සෝමාවතිය, මාදුරුඔය, වනෝද්යානය මෙන්ම ත්රිකෝණමඩු රක්ෂිත අතර අලි ගමන් කරන ප්රධාන අලි කොරිඩෝව මෙය බවද මෙම කමිටු රැස්වීමේදී වනජීවි නිලධාරින් අනාවරණය කළහ.
මෙම රක්ෂිතයේ සිදුවන මහා පරිමාණ දැව ජාවාරම මෙන්ම වන විනාශය පිළිබඳ සොයා බැලීමට දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාංකාර නාහිමියන් ප්රමුඛ ප්රදේශයේ මහා සංඝරත්නය පරිසර යුක්ති කේන්ද්රයේ නිලධාරීන් පිරිසක්, මෙන්ම ප්රදේශයේ ගොවි නියෝජිතයින් පිරිසක්ද එම රක්ෂිතය 20 වෙනිදා නිරීක්ෂණය කළහ,
මෙහිදී දිඹුලාගල බුද්ධ ශ්රාවක සංඝ සභාවේ ලේඛකාධිකාරී දිඹුලාගල රාහුලාලංකාර නාහිමියන් සඳහන් කළේ මෑත කාලයේ ,අප රටේ සිදුවන දැවැන්තම පරිසර විනාසය මෙය වන බවය.
මෙය අලි මිනිස් ගැටුම් වර්ධනය වීමට බෙහෙවින් බලපා තිබෙන බවත්, ත්රිකෝණමඩුව සූරියවැව රක්ෂිතයේ සිදුවන මහා පරිමාණ වන සංහාරය නතර නොකළහොත් දිඹුලාගල බුද්ධ ශ්රාවක සංඝ සභාව ඇතුළු ප්රදේශයේ ගොවි සංවිධාන නියෝජිතයින් සහ පරිසරවේදීන් දැවැන්ත අරගලයක් ක්රියාත්මක කරන බව රාහුලාලංකාර හිමියෝ කීහ.
සූරියවැව රක්ෂිතයේ වන විනාශ නිරීක්ෂණය කිරීමෙන් අනතුරුව මාධ්යවෙත අදහස් දැක්වූ පරිසර යුක්ති කේන්ද්රයේ ප්රතිපත්ති සහ දැනුවත් කිරීමේ නිලධාරී ජානක විතානගේ සඳහන් කළේ මෙම පරිසර විනාශයට එරෙහිව ශ්රි ලංකා මහවැලිය අධිකාරියටත් පශු සම්පත් සංවර්ධන මණ්ඩලයටත් ඊට වගකිය යුතු අංශ සියලු දෙනාහටත් එන්තරවාසි යොමු කොට ඇති බවය.
ඒ සදහා මෙතෙක් පිළිතුරු නොමැති බවකී ඔහු මෙම විනාශය වහාම නතර කිරීමට ඉදිරියේදී අධිකරණ ක්රියාමාර්ග ගන්නා බව කීවේය..
