පසුගිය 11 වැනිදා උදෑසන ගම්පොළ, දවුලගල ප්රදේශයේදී වෑන් රථයකින් පැමිණ 19 හැවිරිදි පාසල් සිසුවියක පැහැර ගැනීමට සම්බන්ධ ප්රධාන සැකකරු හා ඊට අනුබල දුන් තවත් සැකකරුවෙකු මේ මස 27 වනදා දක්වා රක්ෂිත බන්ධනාගාර ගත කිරීමට ගම්පොළ මහෙස්ත්රාත් අධිකරණය අද ( 15 ) නියෝග කළේය.
පැහැර ගැනිමේ දී සිය ජීවිතය පරදුවට තබා තරුණයෙක් මේ දැරියව බේරා ගැනීමට උත්සාහ කළ ද එම උත්සාහය ව්යර්ථ වූ අතර දැරිය පිළිබඳ කිසිම තොරතුරක් 12 වැනිදා දිනයේ දී ලැබී තිබුණේ නැත. ඒ අනුව විශේෂ පොලිස් කණ්ඩායම් 03ක් මේ පැහැර ගැනීම සම්බන්ධව සෙවීමට යොදවා තිබුණි. මේ අතර දැරියගේ පියාගෙන් ලක්ෂ 50ක මුදලක් කප්පමක් ලෙස ලබා ගැනිමට එම දැරිය පහැරගත් දැරියගේ ඥාති සහෝදරයෙක් බව කියන පුද්ගලයා උත්සාහ කර තිබිණි.
දුරකථන සංඥා ජාල විමර්ශනයත් සමග දියත් වුන මෙහෙයුම්වල ප්රතිඵලයක් ලෙස ඉකුත් 13වනදා අම්පාර නගරයේදී මෙම පැහැරගැනීමට සම්බන්ධ ප්රධාන සැකකරු අත්අඩංගුවට ගෙන සිසුවිය පොලිස් භාරයට ගැනීමට පොලීසියට හැකිවිය.ඉන් අනතුරව සිද්ධියට සම්බන්ධ තවත් සැකකරුවෙකු ඊයේ (14) අත්අඩංගුවට ගත් අතර වෑන් රථය පදවාගෙන ගිය රියදුරා 12 වැනිදා පොලිස් අත් අඩංගුවටපත් විය.
මේ වනවිට පැහැරගැනීමට ලක් වූ දැරිය අධිකරණ වෛද්යවරයාගේ පරීක්ෂාවෙන් පසු, අධිකරණය වෙත ඉදිරිපත් කර දෙමාපිය භාරයට පත් කර ඇත. දවුලගල පොලීසිය මෙම සිදුවීම සම්බන්ධයෙන් වැඩිදුර විමර්ශන සිදුකරනු ලබයි.
