ආගම්වාදය සහ ජාතිවාදය අවුලුවන දේශපාලන මැදිහත්වීම් සිදුනොවන්නේ උතුරු නැගෙනහිර පළාත්වල ජනතාවගේ අවංක උවමනාව මත මතුවෙමින් ඇති සියලුම ප්රශ්න විසඳා ගත හැකි බව ජනාධිපතිවරයා අවධාරණය කළේය.
කන්කසන්තුරේ තිස්ස විහාරය ප්රමුඛ කරගෙන මේ වනවිට මතුවී ඇති නිර්දය ජාතිවාදී ගෝත්රික දේශපාලනය හේතුවෙන් ඇතිවන තත්ත්වය අවධානයට යොමු කරමින් මන්ත්රීවරුන් විසින් මතුකරන ප්රශ්නයකට පිළිතුරු දෙමින් ජනාධිපතිවරයා මේ බව ප්රකාශ කළේ ඊයේ (21) පාර්ලිමේන්තුවේ ආරක්ෂක කටයුතු පිළිබඳ අමාත්යාංශයීය උපදේශක කාරක සභාවේ පළමු රැස්වීම ජනාධිපතිවරයාගේ ප්රධානත්වයෙන් පැවති අවස්ථාවේ දී ය.
මෙහිදී ජනාධිපතිවරයා පෙන්වා දුන්නේ ආගමිකවාදය සහ ජාතිවාදය දේශපාලනයෙන් සහමුලින්ම ඉවත්විය යුතු බවය. එම ප්රදේශයේ පුරවැසියන්ගේ අවංක උවමනාව මත මෙම සියලු ප්රශ්න විසඳාගතහැකි බවත් ඇතැම් පටු දේශපාලන වාසි අපේක්ෂා කරන කණ්ඩායම් මෙවැනි අවස්ථාවන් දේශපාලන ගැටලු බවට පත් කරන බවත් ජනාධිපතිවරයා පැවසීය.
එබැවින් පටු දේශපාලන වාසි තකා ජාතිවාදය සහ ආගම්වාදය ඇතිකිරීමට කිසිවෙකුට ඉඩ නොතැබීමට කටයුතු කරන බවත් ජනාධිපතිවරයා අවධාරණය කර සිටියේය.
එසේම ජාතික ආපදා කමිටුව ස්ථාපිත කිරීමේ අවශ්යතාවය පිළිබඳව ද මෙහිදී අවධානය යොමුවිය. ඒ අනුව එම කටයුතු කඩිනමින් අවසන් කරන ලෙස ජනාධිපතිවරයා නිලධාරීන්ට අවශ්ය උපදෙස් ලබා දුන්නේය.
