තංගල්ල මුහුදේ පාවෙමින් තිබියදී යොසා ගත් පාර්සල් 51ක තුළ අයිස් මත්ද්රව්ය සහ හෙරොයින් මත්ද්රව්ය අඩංගු බව මේ වනවිට තහවුරු වී තිබේ.
තංගල්ල රැකව මුහුදු තීරයට නාවික සැතපුම් පහක් පමණ එපිට මුහුදේ පාවෙමින් තිබියදී සොයා ගත් මෙම සැක කටයුතු සුදු පැහැති පාර්සල් මුලින්ම දැක තිබුණේ තංගල්ල නාවික හමුදා කඳවුරේ මුර සංචාරක යාත්රාවක සිටි නිලධාරීන්ය.
මේ සම්බන්ධව සිය උසස් නිලධාරීන් දැනුම්වත් කළ නාවික හමුදා සෙබලුන් තවත් යාත්රා දෙකක් ගෙන්වා සැක කටයුතු පාර්සල් 51ක් එකතු කරගෙන යාත්රා තුනම අද රාත්රී 07 ට පමණ තංගල්ල ධීවර වරායට ලඟා වී තිබිණි.
දැනට ඇති නිල නොලත් ආරංචි මාර්ග පවසන්නේ ගොඩට ගෙනෙන ලද පාර්සල් 51න් පාර්සල් 3ක අයිස් මත්ද්රව්ය ඇති බවත් ඉතිරි පාර්සල් 48 තුළ හොරොයින් මත්ද්රව්ය ඇති බවත්ය.
එම මත්ද්රව්යවල බර ටොන් එකකට අධික බව මුලික විමර්ශනවලදී අනාවරණය වී තිබේ. මත්ද්රව්ය පාර්සල්වල බර කිරා නිසි වාර්තා තැබීමෙන් අනතුරුව ඒවා මත්ද්රව්ය නිවාරණ කාර්යාංශය වෙත භාර දෙන බව නාවික හමුදා නිලධාරියෙක් මාධ්ය වෙත පැහැදිලි කළේය.
මෙම සිදුවීම නිරීක්ෂණය කිරීමට නාවික හමුදාපති වයිස් අද්මිරාල් කාංචන ගනේගොඩ ද තංගල්ල ධීවර වරායට පැමිණ සිටියේය .
මත්ද්රව්ය නිවාරණ කාර්යාංශය භාර නියෝජ්ය පොලිස්පති අශෝක ධර්මසිංහ මත්ද්රව්ය බාරගැනීම අධීක්ෂණ කිරීමට පැමිණ සිටිනු දක්නට ලැබිණි.
